OEKUSI, 17 Jullu 2025 (TATOLI) – Servisu Rejistrasaun no Verifikasaun Emprezariál, Institutu Públiku (SERVE,I.P) sukursál Rejiaun Administrativa Espesiál Oekusi Ambeno (RAEOA), enfrenta problema fasilidade.
“Ami-nia difikuldade mak fasilidade, dalaruma fó impaktu ba ita-nia emprezariu ka negosiante sira, kuandu sira mai trata dokumentu, dalaruma tenke hein kle’ur mak foin bele foti, hanesan tinta surat-tahan ka HVS no menus komputadór,” Koordenadór SERVE,I.P sukurál Oekusi, Sergio Emanuel Colo, relata, ba jornalista sira iha Oekusi, foin lalais ne’e.
Notísia relevante:Janeiru-Juñu, SERVE Oekusi kontribui reseita rihun-ualu resin ba kofre Estadu
Difikuldade sira-ne’e, nia dehan, parte SERVE,I.P enkamiña ona proposta ba iha Autoridade RAEOA. Katak, sei bele karik apoia mós instituisaun sukursál Oekusi, tanba reseita ne’ebé SERVE,I.P rekolla iha Oekusi tama iha konta bankaria RAEOA nian la’ós ba nasionál.
“Ida-ne’e mak problema ne’ebé ami enfrenta. Kona-ba rekursu umanu, sufisiente tanba iha ne’e ami na’in-14, ne’ebé serbisu la’o di’ak só fasilidade sira-ne’e mak difikulta ami,” nia dehan.
Hatan ba ne’e, Prezidente Autoridade RAEOA, Rogério Tiago Lobato, rekoñese difikuldade sira-ne’ebé SERVE,I.P enfrenta no promete sei rezolve iha tempu-badak.
“Ha’u hatene problema ne’e. Uluk kedas sira enfrenta primeiru mak fatin maibé agora rezolve ona, ne’ebé fasilidade ha’u simu ona sira-nia pedidu, ne’ebé iha tempu-badak ami sei rezolve sira-nia problema,” nia promete.
Notísia relevante: https://tatoli.tl/2023/04/19/autoridade-sei-inaugura-projetu-serve-no-iade-iha-oe-cusse/
Rekorda fali katak, iha trimestre primeiru to’o trismestre daruak, husi fulan-Janeiru to’o Juñu 2025 ne’e, SERVE,I.P sukursál Oekusi rekolla ona reseita rihun $8,639,15 ba kofre Estadu, ne’ebé rekolla husi tratamentu dokumentu emprezáriu no kioske hamutuk 1.258 ho tipu Enim, Unipesoál Lda no Sa.
Jornalista: Abílio Elo Nini
Editór: Rafael Ximenes de A. Belo
