DILI, 17 Jullu 2025 (TATOLI) – Empreza estatál Bee Timor-Leste (BTL, E.P) notifika, entre Janeiru no Juñu, kliente hamutuk 1.950 iha munisípiu Dili, tanba sira komete infrasaun kona-ba fornesimentu bee-moos.
Prezidente BTL, Gustavo da Cruz, esplika katak notifikasaun ne’ebé halo tanba kliente sira halo ligasaun bee ilegál, sobu kontadór no la selu tarifa bee tuir lei.
“Fó notifikasaun maibé la halo tuir, tenke hakotu ligasaun. Bainhira sira kumpre selu multa maka BTL ba liga fali”, dirijente BTL dehan ba Tatoli, ohin.
Nia adianta katak husi kliente ne’ebé simu notifikasaun, 594 mak responde no halo kooperasaun hodi reativa ligasaun bee. Kliente 996 sira seluk kontinua la koopera, tanba ne’e BTL dezliga bee ba sira.
Medida sira ne’e hala’o bazeia ba dekretu-lei númeru 4/2004, loron 11 Fevereiru, kona-ba Aprova Rejime Fornesimentu Bee ba Konsumu Públiku, nune’e mós diploma ministeriál númeru 1/2004, loron 11 Fevereiru, ne’ebé ko’alia kona-ba Tabela Tarifária no ikus liu diploma ministeriál númeru 1/2009, loron 5 Outubru, sobre Fiskalizasaun Sistema Abastesimentu Bee.
Nune’e ba hirak ne’eb la selu tarifa bee-moos sei deslizga no atu selu hodi liga fali mós tenke halo tuir dekretu-lei númeru 4/2024, iha artigu 14 artigu alínea a). Tenke selu hotu fatura pagamentu ne’ebe durante la selu, b) Selu hikas ligasaun foun.
Ba komunidade ne’ebé sobu metru kontadór ka halo aat metru kontadór tenke selu hotu fatura pagamentu ne’ebé durante la selu, no selu multa pesoál $15, koletiva $300, prazu loron 10. Kuandu liu aumenta $4 ba pesoál no $100 ba koletiva.
Ba halo ligasaun ilegál selu multa pesoál $10, koletiva $150, prazu loron 10, bainhira liu aumenta $4 ba pesoál no $100 ba koletiva.
Nune’e ba sira ne’ebé uza bomba elétrika direta ba kanalizasaun públika tenke selu hotu fatura pagamentu ne’ebé durante la selu, selu multa pesoál $10, koletiva $150, prazu loron 10, kuandu liu aumenta $4 ba pesoál no $100 ba koletiva.
Notísia relevante: BTL rekolla reseita millaun $1,1 iha semestre dahuluk
Jornalista: Arminda Fonseca
Editora: Maria Auxiliadora
