DILI, 17 Jullu 2025 (TATOLI)–Ministra Edukasaun, Dulce de Jesus, otimista katak iha fulan ida-ne’e nia laran manorin kuaze 200 ne’ebé rekrutadu husi programa bolsa kandidatu no kolokadu iha Eskola Pre-Eskolár iha fulan-Abríl liubá sei simu saláriu ne’ebé la tama fulan-tolu ona.
“Ha’u rekoñese iha fallansu oituan iha Ministériu Edukasaun, ami koko atu rezolve, ami fiar katak depoizde serbisu hamutuk ho Komisaun Funsaun Públika (KFP) no Ministériu Finansa, pelumenus iha loron 25 mai ne’e manorin bolsa kandidatu sira ne’ebé koloka iha fulan-Abríl bele simu ona sira-nia saláriu ba fulan-tolu,” Ministra Edukasaun, Dulce de Jesus Soares, informa ba jornalista sira, iha sala VIP Ministériu Edukasaun (ME), Vila Verde, Kinta ne’e.
Ministra dehan, manorin rekrutadu bolsa kandidatu antes ne’e mós lori tempu kuaze fulan-tolu atubele hetan pagamentu dahuluk.
Notísia relevante : Profesór bolsa kandidatu balun seidauk submete bom komportamentu
Nune’e, ba oin ME sei serbisu hamutuk ho Ministeriu Administrasaun Estatál (MAE) atu uza sistema eletrónika atu nune’e Inspetór Eskolár no Diretór Eskola sira bele rekolla lalais liután lista prezensa manorin sira.
“Sira simu tiha tomada pose depois ita koloka sira ba eskola, maibé atu selu saláriu ita tenke garante katak sira iha lista prezensa, nune’e ita hatene tuir katak loos duni manorin sira ne’ebé ita koloka iha ne’ebá, bele justifika nia hanorin iha ne’ebá, entaun nia merese atu simu saláriu,” nia akresenta.
Ministra adianta, karik parte eskola tarde manda lista prezensa mak sei difikulta pagamentu saláriu. Tanba prosesu ida envia lista husi eskola mai iha munisípiu, depois munisípiu verifika tiha lista prezensa, hafoin hatama mai Ministériu Edukasaun hodi haruka fali ba KFP ba payroll nune’e mak ba prosesu pagamentu.
“Sira seidauk iha númeru payroll. Horisehik kedas ha’u halo enkontru ida ho Diresaun Nasionál Rekursu Umanu no Diresaun Nasionál Finansa, ami mós halo koordenasaun ho Ministériu Finansa atubele haree asuntu ida-ne’e, nune’e iha fulan hirak mai labele tan mosu problema hirak ne’e,” nia katak.
ME sei haree uluk manorin sira-nia saláriu fulan-tolu, depois mak haree filafali prosesu tuir mai.
Notísia relevante : Reprezentante Povu levanta profesór husi bolsa kandidatu la simu saláriu fulan tolu
Jornalista : Osória Marques
Edirora : Julia Chatarina
