DILI, 17 Jullu 2025 (TATOLI)–Uniaun Nasionál Eskuteiru Timor-Leste (UNE-TL) realiza atividade jambore hodi kapasita estudante sira iha área sosiál. Abertura atividade jambore hahú iha loron 28 Jullu tuku 16:00.
“Ida-ne’e sai atividade importante ba eskola ne’ebé reforsa liután estudante nia kapasidade iha atividade sosiál sira,” Ministra Edukasaun, Dulce de Jesus Soares, hato’o ba jornalista sira iha salaun VIP Ministériu Edukasaun (ME), Vila-Verde, Kinta ne’e.
Ministra Edukasaun dadeer ne’e hasoru malu ho dirijente UNE-TL, hodi ko’alia kona-ba kontinuasaun atividade jambore.
Tuir planu atividade ne’e sei hala’o iha loron 28 Jullu to’o 10 agostu, ne’ebé hanesan atividade dahuluk jambore nasionál ne’ebé sei envolve estudante, profesór inklui diretór husi ME.
“Tinan ne’e ita sei envolve estudante hamutuk 500,” nia akresenta.
Notísia relevante : Assanami: Envolvimentu joven iha UNE-TL iha valór ba konstrusaun Estadu
Prezidente UNE-TL, António da Luz, haktuir, enkontru ne’e hodi ko’alia kona-ba programa rua, kompostu husi UNE-TL no ME asina nota entendimentu iha fulan hirak liubá, ne’ebé atu realiza atividade eskurizmu iha eskola báziku terseiru siklu iha munisípiu Dili. Atividade eskutizmu mak tékniku eskutizmu, ida-ne’e ninia matéria barak no atividade seluk mak lori ba fatin istóriku hanesan muzeu, komarka iha CAVR nia fatin.
“Ida-ne’e hanesan esktrakuriler ne’ebé parte rua halo iha ida-idak ninia eskola. Atividade ne’ebé realiza iha munisípiu Dili ba dahuluk mak jambore, ne’ebé sei halo iha loron 28 to’o 10 Agostu, iha sentru treinamentu Metinaru.
“Atividade ne’e, ita planeia konvida partisipante hamutuk 500 husi eskola sira husi munisípiu Dili tuir agrikuamentu 10 ne’ebé eziste ona,” nia katak.
Aleinde ne’e, sei konvida mós agrupamentu eskuteiru husi munisípiu seluk hodi partisipa iha atividade jambore.
Jornalista : Osória Marques
Editora : Julia Chatarina
