DILI, 18 jullu 2025 (TATOLI)—Atleta GraciaBeth Valosa Amando Tilman de Carvalho fiar-an sei manán kompetisaun modalidade Tenis Kampu iha ámbitu Jogu Desportivu Komunidade País Lian Portugés (CPLP, sigla portugés) ne’ebé sei realiza iha Dili, Timor-Leste.
“Hanesan feto, ha’u sente kontente bainhira Federasaun Tenis hili ha’u atu joga hasoru nasaun Portugál ho modalidade Tenis, entaun iha momentu ne’ebá ha’u treinu maka’as atu bele hetan vitória hodi lori Timor-Leste nia naran bá mundu,” GraciaBeth Valosa Amando Tilman de Carvalho hato’o ba Ajénsia TATOLI, iha kampu Tenis Kampu Universidade Nasionál Timor-Leste (UNTL) Sentrál, Sesta ne’e.
Atleta ne’e hahú treinu Tenis hahú kedan desde tinan 12, to’o agora idade 14 Federasaun hili hodi joga hasoru nasaun Portugál.
“Durante ha’u tuir iha kampu ida-ne’e, aprende oinsá joga tenis ne’e, entaun ikus Federasaun hili ha’u hodi bele tama iha Jogu CPLP ida-ne’e” nia akresenta.
Notísia relevante : Jogu CPLP nu’udar símbolu solidariedade no amizade entre nasaun luzófona
To’o agora nia halo preparasaun másimu no Treinadór sira fó tempu ba atleta sira treinu tanba hotu-hotu nia hakarak mak tenke lori Timor ba oin.
“Ami-nia preparasaun ne’e antes fulan-tolu liubá to’o agora no ami prepara másimu ona atu hasoru ekipa Portugál iha loron domingu iha tuku 15:00 lorokraik iha kampu UNTL,” nia tenik.
Iha fatin hanesan, Atleta Frans Sarmento da Silva, sente kontente tanba Federasaun sira hili ona nia hodi joga iha modalidade.
“Ha’u sente kontente tebes tanba ha’u sei joga hasoru nasaun Portugál no ha’u sente katak ha’u manán hodi lori nasaun Timor-Leste ba mundu,” Frans Sarmento, otimista.
Nia konfesa, Treinadór sira durate ne’e fó treinu di’ak tebes to’o ohin loron, tanba durante ne’e atleta sira hela iha Otél Ramelau hodi prepara-an tuir jogu CPLP.
Jornalista : Felicidade Ximenes
Editór : Cancio Ximenes
