OEKUSI, 18 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, sesta ne’e, entrega ró ida no komputadór rua ba Polísia Nasionál Timor-Leste (PNTL) liuhusi Unidade Patrullamentu Marítima (UPM) atu apoia seguransa iha tasi-laran nu’udar preparasaun ba futuru sertifikasaun aeroportu Rota do Sândallo.
Notísia relevante:Manetelu atualiza rezultadu reuniaun kona-ba sertifikasaun aeroportu ba PM interinu
Rogério Tiago Lobato, informa, objetivu husi apoia ro ne’e, nu’udar kritéria ida atu kompleta rekezitu husi Organizasaun Internasionál Aviasaun Sívil (ICAO) nian ba futuru atu sertifikasaun aeroportu Rota do Sândallo, tanba dezde UPM eziste iha Oekusi, seidauk iha fasilitasaun meiu hanesan ró atu hala’o patrullamentu iha tasi-laran.
Imajen TATOLI/Abílio Elo Nini
“Aviaun ida atu tuun iha aeroportu presiza kria kondisaun barak, tenke iha karreta bombeiru no fasilidade seluk atu responde situasaun emerjénsia, iha tasi-laran mós presiza iha ró ida hodi halo salvamentu, karik aviaun iha asidente ruma, entaun ohin ita entrega ba UPM atu sira-bele halo patrullamentu ka seguransa iha tasi-laran, tanba iha Oekusi ita seidauk iha meiu, ne’e mós kriteria ida tanba iha tempu-badak sei halo ona sertifikasaun aeroportu Rota do Sândallo,” Rogério Lobato dehan, iha Portu Iwao Kitahara Mahata Oekusi, ohin.
Nia informa, Ministériu Interiór (MI) mós destaka ona Falintil-Forsa Defeza Timor-Leste (F-FDTL) komponente navál iha Oekusi, nune’e iha tempu-badak Autoridade RAEOA mós sei kria kondisaun.
Tanba tuir kaléndariu, Governu liuhusi Ministériu Transporte no Komunikasaun (MTK) sei hala’o sertifikasaun ba aeroportu Rota do Sândallo Oekusi iha loron 30 fulan-Agostu 2025 ne’e.
Imajen TATOLI/Abílio Elo Nini
“Agora Oekusi iha forsa rua mak servisu ba tasi nian, ida mak UPM no forsa navál sira, entaun ohin ita entrega fasilidade ró no komputadór ba UPM, ba navál sira, ita arranja tan iha tempu-badak, tanba ne’e obrigasaun, nu’udar kritéria ida atu kumpleta ba futuru sertifikasaun aeroportu Rota do Sândallo,” nia informa.
Iha biban ne’e, jornalista Ajénsia Tatoli,I.P tenta konfirma ho komandante Polísia Unidade Marítima (UPM) destakadu Oekusi maibé rejeita atu fó informasaun tanba laiha autorizasaun husi komando nasionál.
Nune’e totál membru husi Polísia Unidade Marrítima (UPM) ne’ebé hala’o seguránsa ba tasi iha Oekusi hamutuk na’in-neen.
Notísia relevante:Aeroportu Rota do Sândalo seidauk bele sertifika tanba presiza manutensaun
Jornalista: Abílio Elo Nini
Editór: Rafael Ximenes de A. Belo
