Finalista hamutuk 354 UNITAL simu graduasaun
DILI, 18 Jullu 2025 (TATOLI)—Universidade Orientál Timor-Lorosa’e (UNITAL), Sesta ne’e, organiza serimónia graduasaun ba dala-XV ho tema ‘forma jerasaun ida inkluzivu, inovadór, pro-ativu, ba dezenvolvimentu sustentável Timor-Leste nian’, iha salaun UNITAL, Bekora.
Finalista hamutuk 365 husi fakuldade hitu maka simu graduasaun, kompostu husi fakuldade Enjeñaria 33, Direitu neen, Edukasaun 112, Agrikultura 29, Siénsia Saúde 118, Ekonomia 11, Siénsia Sosiál no Polítika 45.
“Labele sente dúvida ba Siénsia ne’ebé imi hetan iha UNITAL ida-ne’e. Ko’alia kona-ba kualidade, la’ós karater pesoál maibé kompromisu ida-ne’ebé beibeik hodi atinje ba kualidade ne’ebé di’ak liután. Kompeténsia mak sei komprova ninia kualidade iha universidade ida-ne’e,” Reitór UNITAL, Claudino Ninas Nabais, informa iha ámbitu serimónia graduasaun.
Reitór konsidera graduasaun nu’udar faze ida importante iha jornada akadémika.
“Sira-nia estudu ohin loron finaliza ne’e hanesan inspirasaun ba estudante sira seluk. Ohin momentu ida-ne’ebé importante iha imi-nia jornada akadémika no atinje grau ne’ebé a’as tebes. Graduadu ida tenke ho nia vizaun no kbiit halo projesaun ba longu prazu atu nune’e bele iha preparasaun,” nia akresenta.
Nia enkoraja, graduadu sira atu fiar ba siénsia ne’ebé hetan no labele tauk kompete ho universidade sira seluk.
“Tanba ne’e, fiar ba siénsia no kualidade sufisiente hodi kompete, labele tauk ba imi-nia kapasidade, siénsia ne’e universál. Labele aprende tanba siénsia ne’ebé aprende iha UNITAL hanesan mós iha universidade sira seluk. Tanba ne’e, bainhira la’o tenke ho imi-nia almater,” Reitór hameno.
Notísia relevante : Estudante UNITAL husu Governu envolve partisipasaun joven iha PEDN
Desde eziste to’o agora, UNITAL forma ona estudante 6.208 hodi simu graduasaun no aumenta tan ohin 354.
“Sira ne’e lubuk mak iha kampu traballu hanesan instituisaun Governu, membru Parlamentu Nasionál, instituisaun privadu sira no iha área negósiu sira,” nia katak.
Graduadu UNITAL, Jenito da Silva, sente orgullu tanba ohin loron bele simu títulu akadémiku iha UNITAL.
“Susesu ida-ne’e ba ami no ho esperansa katak orgullu mós ba inan-aman, Reitór, Dekanu, inklui dosente. Ohin urgullu ida simu títulu akadémiku gradualmente finaliza estudu iha ensinu superiór,” nia dehan.
Tuir graduadu ne’e, jerasaun foun tenke sai aliserse ne’ebé sei fó kontinuidade ba estudu ida-ne’e.
“Ita presiza prepara-an hahú agora ba oin. Hatur ita-nia orientasaun ne’ebé klaru bazeia ba ita-nia kreatividade no inovasaun revolusaun na karakter,” nia tenik.
Serimónia graduasaun ne’e partisipa husi Reprezentante Ministériu Ensinu Superiór Siénsia no Kultura (MESSK), Diretora Jerál MESSK, Maria Filomena Lay, Diretór Ezekutivu Ajénsia Nasionál Avaliasaun Akreditasaun Akadémika (ANAAA), Nilton Diamantino Paiva Mau, Reprezentante Institutu Nasionál Siénsia no Teknolojia (INCT, sigla portugés), Tenente Jenerál Lere Anan Timur, inklui inan-aman graduadu.
Jornalista : Osória Marques
Editora : Julia Chatarina
