DILI, 07 Jullu 2025 (TATOLI)—Reprezentante estudante husi Universidade Orientál Timor Lorosa’e (UNITAL) husu Governu atu envolve partisipasaun joven nian iha Planu Estratéjiku Dezenvolvimentu Nasionál, tanba juventude mak pilár dezenvolvimentu ba Estadu.
Notísia Relevante: Estudante UNITAL husu Governu aselera implementasaun podér lokál
Senadu Fakuldade CSPOL UNITAL, António Gomes, hateten iha PEDN indika setór ne’ebé importante liu atu kria dezenvolvimentu ba nasaun mak hanesan edukasaun, saúde no turizmu, tamba ne’e Governu tenke esforsu investe maka’as setór tolu ne’e iha programa PEDN 2021-2030 hodi garante dezenvolvimentu no aumenta reseita ekonómia interna.
“Maske setór tolu ne’e ladun la’o ho efetivu, kestaun tanba restrutura tuir mandatu no seluk tan mak lideransa ladun tau prioridade hodi afeta povu nia nesesidade no seidauk bele garantidu tuir meta ne’ebe iha,” Senadu ne’e informa ba Agência Tatoli, ba Ajénsia Tatoli hafoin semináriu nasionál ne’ebé organiza husi Agência Tatoli servisu hamutuk ho UNITAL ho tema “Konseitu Estadu no Vizaum Estratéjika ba Dezenvolvimentu Nasionál”, iha salaun UNITAL, Bekora, ohin.
Tanba ne’e, nia dehan, Timor-Leste labele sukat progresu dezenvolvimentu ho di’ak, enkuantu barreira sei nafatin iha no bareira ne’e rasik mak lideransa no orsamentu. Tanba, bainhira mandatu ida hotu-ida mai fali reestrutrura programa, nune’e husik hela buat ruma ne’ebé seidauk hotu ba halo fali programa foun, entaun Timor-Leste lahatene objetivu loloos.
“Governu tenke envolve juventude nia partisipasaun ba dezenvolvimnetu, tanba joven mak sai pilár no jerasaun ba Estadu. Nune’e, ami mós prepara-an hodi kompete ho ema seluk liuhusi kapasidade ne’ebé ami iha,” nia hateten.
Nia konsidera, dalabarak Estadu uza de’it joven sai instrumentu ba iha materiál kampaña atu manán votu maibé to’o iha faze implementasaun ne’e laiha ka zero totál.
Aleinde ne’e, estudante husi Departamentu Administrasaun Públika, Jeliana Gracia Sarmento, reforsa katak joven tenke esforsu hodi sai pilár ba buat hotu, maske moris iha mukit nia laran maibé nasaun hein hela ninia fini hodi kontinua lidera Estadu demokrátiku ne’e ho di’ak liután.
“Ida-ne’e loke oportunidade hanesan joven ida iha ninia papél importante atu aprende husi aumenta koñesementu hodi sai pilár importante ida ba Estadu iha futuru oin mai,” nia dehan.
Nia hateten, PEDN 2021-2030 ne’e, Governu konsege halo ona mudansa ba setór balun liuliu insfranstrutura bázika maibé seidauk efetivu liután, entaun presiza halo observasaun no analiza hahú agora hodi define lolos programa ne’ebé mak Governu seidauk implementa to’o agora atu oinsá iha futuru mai bele halo kompleta liután.
“Nune’e Governu tenke tau prioridade ba PEDN ne’e rasik atu labele abandona programa balun hodi implementa fali programa foun iha mandatu tuir mai, maibé oinsá atu harii fali-fali aliserse ne’ebé uluk konstrui hela bele hada sa’e aas liután,” nia sujere.
Nia dehan, presiza aumenta mós profesór sira hodi eleva setór edukasaun, labele estabelese de’it eskola maibé oinsá hakbiit profesór sira hodi badinas eduka estudante sai matenek no maduru iha loron aban.
Notísia Relevante: Tatoli-UNITAL organiza diskusaun kona-ba Konseitu Estadu no Vizaun Estratéjika
Jornalista : Alexandra da Costa
Editór : Cancio Ximenes
