DILI, 07 Jullu 2025 (TATOLI)- Ajénsia Notisioza Timor-Leste -Tatoli, I.P, koopera ho Universidade Orientál Timor Lorosa’e (UNITAL) hodi organiza semináriu nasionál ho tema “Konseitu Estadu no Vizaun Estratéjika ba Dezenvolvimentu Nasionál”.
Oradór prinsipál iha semináriu ne’e mak hanesan Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano ‘Assanami’ Sabino. Eventu ne’e halo abertura husi Sekretáriu Estadu Komunikasaun Sosiál (SEKOMS), Expedito Loro Dias Ximenes.
Atividade ida-ne’e hola parte iha ámbitu aniversáriu Tatoli nian ba dasiak, ne’ebé sei realiza iha 27 Jullu 2025.
Prezidente Konsellu Diretivu Tatoli I.P, Noémio Falcão, hateten semináriu ida-ne’e realiza tanba hakarak lori estudante sira ba hodi rona kona-ba tópiku sira ne’ebé iha no mós impaktu utilizasaun mídia iha tempu agora.
Dirijente ne’e espera katak semináriu ida-ne’e bele fó buat di’ak ruma ba estudante sira.
Iha fatin hanesan Reitór UNITAL, Claudino Ninas Nabais, dehan semináriu ne’e importante tebes tanba iha eventu ne’e oradór sira fahe matenek no esperiénsia ba estudante sira hanesan bukae ida ba sira-nia futuru.
Tuir nia, UNITAL hetan previléjiu boot tanba marka prezensa husi Vise-Primeiru-Ministru Mariano ‘Assanami Sabino’ nu’udar jerasaun foun ida ne’ebé kontribui luta ba nasaun ne’e.
“Ami nakloke ba oradór ne’ebé de’it bele mai fahe esperiénsia ba estudante sira, tanba iha ne’e atu eduka, oinsá forma sira-nia karáter sai lideransa ba futuru nasaun nian. Ami espera katak estudante 300-resin bele apreende buat ruma husi semináriu ne’e tanba ko’alia kona-ba konseitu Estadu no Vizaun Estratéjika ba Dezenvolvimentu Nasionál. Husu estudante sira aproveita didi’ak oportunidade hodi aumenta ita-boot sira-nia matenek”, nia sujere.
Sekretáriu Estadu Komunikasaun Sosiál, Expedito Dias Ximenes, iha abertura ba serimónia ne’e realsa, SEKOMS kontinua valoriza no apoia inisiativa sira ne’ebé kombina entre setór komunikasaun sosiál no edukasaun.
Tuir nia, parseria ida-ne’e hanesan prova katak komunikasaun públiku no instituisaun ensinu superiór bele kolabora hamutuk ho forma sólida iha étika, profisionál, no serbisu ba interese públiku.
“SEKOMS fiar katak ho parseria ida ne’e tenke fortifika, importante atu hadi’a kualidade informasaun, reziste kontra dezinformasaun hodi insentiva no fó forsa ba liberdade imprensa, espresaun, ne’ebé la sees husi responsabilidade”, nia dehan.
UNITAL hanesan instituisaun akadémika, iha papél estratéjiku no fundamentál iha dezenvolvimentu umanu Timor-Leste nian. Universidade fó kapasitasau teórika no prátika ba estudante sira, instituisaun akadémika bele halo estudu no peskiza kona-ba tendénsia sira iha polítika, sosiuekonómiku no kultura. Rezultadu peskiza bele sai baze no fó alternativu ba polítiku na’in sira atu sai opsaun hodi deside nasaun nia futuru.
“Ita hotu iha misaun komún ho objetivu eduka, informa no empodera koñesimentu ba povu Timor-Leste. Parabéns ba Tatoli no UNITAL ba inisiativa ne’e. SEKOMS sei kontinua disponivel atu apoia programa sira ne’ebé fó kontribuisaun reál ba dezenvolvimentu nasionál”, dehan.
Nia dehan UNITAL iha papél atu estimula ho pensamentu krítiku kona-ba konteúdu ne’ebé liga ho nesesidade nasaun nian. Só ho Pensamentu krítiku, UNITAL bele ajuda sosiedade ida ne’e sai krítiku no matenek iha sira-nia desizaun sira.
Nia parte mós apela ba estudante sira utiliza mídia sosiál ho di’ak, tanba bainhira utiliza la ho di’ak mak sei fó impaktu mós ba ema.
Daudaun ne’e iha evolusaun teknolojia neʼebé lais tebes no bele hamosu mós informasaun ne’ebé bele simu ho di’ak, maibé mós fó risku ba ema.
Ho avansu teknolojia neʼebé hothotu akompaña daudaun la’ós de’it órgaun komunikasaun sosiál sira de’it maka prodús informasaun, maibé halo ema idaidak ne’ebé iha telefone android bele mós prodús informasaun. “Maibé, ha’u husi imi hotu utiliza mídia tenke ho di’ak no prodús informasaun ne’ebé di’ak ba públiku”, konklui.
Lembra katak, antes ne’e Tatoli mós promove semináriu ida ho tópiku hanesan ne’ebé koopera ho Dili Institute of Technology (DIT) ho oradadór xave mak Jenerál Lere Anan Timur.
Notísia relevante: Tatoli no DIT promove semináriu kona-ba Konseitu Estadu no Vizaun Estratéjika ba Dezenvolvimentu Nasionál
Jornalista: Arminda Fonseca
Editora: Maria Auxiliadora
