DILI, 20 Juñu 2025 (TATOLI)-Ajénsia Informasaun Ofisiál Estadu Timor-Leste Tatoli, I.P, halo kooperasaun ho Dili Institute of Technology (DIT) hodi organiza iha, sesta-feira ne’e, semináriu nasionál ho tema “Konseitu Estadu no Vizaun Estratéjika ba Dezenvolvimentu Nasionál”.
Oradór prinsipál iha eventu ne’e mak Tenente Jenerál Lere Anan Timur no halo abertura husi Sekretáriu Estadu Komunikasaun Sosiál, Expedito Dias Ximenes.
Atividade ida-ne’e hola parte ba preparasaun aniversáriu Tatoli, I.P nian ba dasiak ne’ebé sei realiza iha 27 Jullu 2025.
Prezidente Konsellu Diretivu Tatoli, Noémio Falcão, hateten TATOLI hanesan mídia estatál ne’ebé hola papél importante iha dezenvolvimentu no konsolidasaun nasionál.
“Ami hanoin katak papél sira prinsipál ida ne’ebé mídia hala’o iha dezenvolvimentu nasionál, aleinde divulga informasaun kona-ba polítika públika, programa Governu, no projetu dezenvolvimentu”, Noémio Falcão hateten iha semináriu ne’e.
Nia dehan Tatoli nakloke hanesan plataforma ba diskusaun públika, fornese espasu ba komunidade atu espresa hanoin, kontribui ba dezenvolvimentu no liuhusi programa oioin ne’ebé Tatoli estabelese, buka atu servisu hamutuk ho instituisaun sira seluk.
“Ohin, TATOLI hahú no agradese barak ba DIT iha kolaborasaun ne’ebé di’ak tebes. Ami tuur hamutuk ko’alia hanesan família ida ho hanoin programa ka atividade ne’e sei sai regulár kada tinan”, nia promote.
Nia esplika tópiku ba semináriu nasionál ohin loron ne’e tema ida ne’ebé boot no hothotu hatene katak Planu Estratejia Dezenvolvimentu Nasionál 2011-2030 atu hotu daudauk. “Ami hanoin katak, alin estudante sira, ita hotu iha ne’e, no hirak ne’ebé iha liur ne’ebá, timoroan sira iha rai seluk, liuhusi kanál Tatoli hein hela, no Tatoli hakarak prezerva hanesan dokumentu neʼebé vale ba jerasaun agora no ba futuru”, dehan.
Reitór DIT, Salustiano dos Reis Piedade, hateten nia parte kontente tebes hodi fó hanoin ba malu oinsá lori dezenvolvimentu nasaun nian ba oin.
“Ami agradese tebes tanba Jenerál Lere Anan Timur bele hola parte iha fatin ne’e. Tema ne’e bele ko’alia kona-ba Konsellu Estadu no Vizaun Estratéjika ba Dezenvolvimentu Nasionál. Ida-ne’e importante tebes tanba ita-nia erói sira luta naruk hetan liberta husi kolonializmu. Agora, ita luta nafatin ba dezenvolvimentu nian, tanba joven mak jerasaun futuru nasaun nian”, salienta.
Iha fatin hanesan, Sekretáriu Estadu Komunikasaun Sosiál, Expedito Dias Ximenes, hateten semináriu nasionál ne’ebé Tatoli realiza hodi fó hanoin balun kona-ba Konseitu no Vizaun Estratéjika Estadu iha Dezenvolvimentu Nasionál.
Governante ne’e reforsa katak ho prezensa Lere Anan Timur nian iha semináriu ne’e importante tebes atu hatudu “ba ita Timor-Leste mai husi ne’ebé? Ita iha ne’ebé no atu bá ne’ebé? Oinsá polítika estratéjiku Estadu iha atu lori dezenvolvimentu ba oin”.
Tuir nia, ho konvida líder nasionál sira fahe sira-nia hanoin kona-ba prosesu dezenvolvimentu nian, nune’e estudante sira tenke rona didi’ak, maski simu teoria husi akadémiku nian, maibé mós bele hetan konsimentu istóriku husi líder nasionál sira.
Iha abertura ne’e, Expedito mós ko’alia kona-ba dezenvolvimentu teknolojia no informasaun daudaun ne’e, tanba Governu haree katak iha evolusaun teknolojia ne’ebé lais tebes bele hamosu mós informasaun ne’ebé bele simu ho di’ak, maibé mós fó risku ba ema.
Ho avansu teknolojia ne’ebé hothotu akompaña daudaun la’ós de’it órgaun komunikasaun sosiál sira de’it maka prodús informasaun, maibé halo ema idaidak ne’ebé iha telefone android bele mós prodús informasaun.
“Tempu agora la hanesan tinan 20 bá kotuk. Daudaun, ho avansu teknolojia ne’ebé la’o lais ita idaidak mós prodús informasaun, maibé nia problema mak ita ne’ebé prodús liuhusi mídia konvensionál, katak televizaun, jornál, rádiu sira ne’e fó sai informasaun liuhusi edisaun”.
Entretantu, tuir nia, informasaun ne’ebé fó sai husi ema idaidak liuhusi plataforma dijitál ka online, dalabarak hamosu dezentendimentu iha sosiedade tanba seidauk kompreende objetivu prinsipál oinsá maka informasaun ne’e bele to’o ba públiku.
Nia dehan hothotu akompaña ho avansu teknolójiku agora mosu tan ho konseitu foun iha espasu dijitál mak Artifisiál Intelijénsia (AI). Tuir nia, ida-ne’e mai la’ós atu hapara maibé dalaruma ema uza teknolojia la hó kuidadu mak nia sei troka “ita-nia fatin”.
“Tanba ne’e ita tenke prepara atu sai joven ida kompetente iha setór oioin, liuliu oinsá maka utiliza espasu dijitá ho di’ak”, nia fó hanoin.
Jenerál Lere Anan-Timur iha biban ne’e hato’o parabéns ba Tatoli ne’ebé sei halo nia aviersáriu ba dasiak.
Iha semináriu ne’e nia parte ko’alia kona-ba konseitu rua, Estadu no Vizaun Estratéjika ba Dezenvolvimentu.
Jornalista: Arminda Fonseca
Editora: Maria Auxiliadora
