DILI, 18 Jullu 2025 (TATOLI)-Governu liuhusi Ministru Interiór, Francisco da Costa Guterres, klarifika proibisaun ba sidadaun Indonézia, Safi’i Kemamang, tama mai teritóriu Timor-Leste, tanba autoridade seguransa hakarak halo avaliasaun.
“Ha’u hanoin kestaun ne’e iha hela prosesu avaliasaun nia-laran, ne’ebé ha’u seidauk bele ko’alia buat barak, más ha’u hein parte seguransa fó lai relatóriu mai ha’u mak ami sei haree saida mak akontese loos”, Francisco Guterres ba jornalista sira iha nia kna’ar fatin Ministériu Interiór Vila Verde, sesta-ne’e.
Nia mos klarifika katak, bandu ne’ebé governu halo liuhusi parte imigrasaun ba Safi’i Kemamang la’ós kestaun polítika. Maibé, dever autoridade seguransa atu haree no avalia, tanba situasaun sira hanesan ne’e la’ós akontese iha Timor de’it.
“Ha’u, uluk ema bolu ha’u ba tuir konferénsia ida iha Roma, maski Roma ha’u ba beibeik, más momentu ida ha’u to’o iha Alemaña iha Frankfurt (aeroportu) ema trava ha’u, ema halo entrevista ba ha’u kuaze oras rua resin nia laran, i ha’u lakon aviaun”, nia halo komparasaun.
Nia hatutan: “Ita husik lai sira halo tiha lai sira-nia servisu, sira sei relata mai ha’u, atu foti desizaun oinsá pois mak ita haree”.
Ministru hatete la hatene Safi’i Kemamang nia parseiru agora-ne’e iha ne’ebé no la hatene Safi’i Kemamang hela kle’ur iha Timor.
“Ha’u mós ladún hatene konaba nia hela iha ne’e kle’ur, ha’u mós la hatene nia problema saida, ha’u hein relatóriu seguransa mai lai mak ha’u foin deside”, nia konklui.
Notísia relevante: PDHJ husu MI anula desizaun bandu Safi’i Kemamang tama Timor
Jornalista : Natalino Costa
Editora : Rita Almeida
