SSK Atabae rejista kazu asu tata ema hamutuk 43
BOBONARU, 18 Jullu 2025 (TATOLI)—Hahú husi fulan-Janeiru to’o 15 fulan-Jullu 2025, Sentru Saúde Komunitária (SSK) Postu Administrativu Atabae, Munisípiu Bobonaru, rejista kazu asu tata ema hamutuk na’in-43 kompostu husi idade labarik ki’ik, adultu no idozu.
Pasiente hirak-ne’e maioria simu hotu ona vasinasaun hodi hasa’e imunidade isin hodi luta kontra vírus raiva.
Notísia relevante: SSK Bobonaru rejista kazu asu tata ema 27, konfirmadu asu rua pozitivu raiva
Xefe Sentru Saúde Komunitária Postu Administrativu Atabae, Roberto Dao Bitin informa katak kazu ne’e rejista barak liu maihusi Suku Aidabaleten no Suku Rairobo.
Atu prevene tranzmisaun vírus, Dao Bitin haktuir katak ekipa Task-Force Munisípiu Bobonaru hala’o ona advokasia saúde iha Suku Rairobo hodi konxiensializa komunidade lori asu ba simu vasina no bainhira asu tata ema ruma tenke fase uluk ho sabaun hafoin lori bá fasilidade saúde simu vasina.
“Iha semana oin ita sei bá tan Suku Atabae no Hataz,” Responsavel SSK Atabae ne’e informa ba jornalista TATOLI iha nia knaar fatin, Sesta ne’e.
Enkuantu, asu ne’ebé tata pasiente hirak-ne’e, asu 16 mak konfirmadu pozitivu vírus raiva, maioria la simu vasina no asu-sanulu (10) deskoñesidu.
Sintoma raiva ba animál
•Siak (hahalok agresivu)
•Kaben sai barak (ipersalivasaun)
•Komesa tata ema, animál no sasán seluk
•Lakohi han no sai fraku
•Ta’uk naroman no tauk bee
•Paraliza no mate
Jornalista: Sergio da Cruz
Editór: Xisto Freitas da Piedade
