DILI, 19 Jullu 2025 (TATOLI)–Atleta no delegasaun nasaun haat husi kontinente Áfrika hamutuk na’in-259, Sábadu ne’e, to’o ona iha Aeroportu Internasionál Prezidente Nicolao Lobato Komoro, Dili.
Delegasaun husi nasaun haat kompostu husi Angola, São Tome e Principe, Moçambique no Cabo-Verde to’o iha Aeroportu Komoro ho voo daruak, iha-ne’ebé dahuluk to’o purvolta tuku 17:31 Otl no voo daruak iha tuku 18:45 Otl.
Xefe Misaun husi Angola, João Fernandes hateten nia parte sente kontente bele hola-parte iha Jogu Desportu Komunidade Nasaun Lian Portugés (CPLP-sigla portugeza) ba dala-XII iha Timor-Leste mezmu hala’o viajen ne’ebé nakonu ho gastu enérjia.
“Ami hamutuk ho nasaun tolu seluk husi Áfrika sente orgullu to’o iha Timor-Leste atu partisipa iha jogu desportu CPLP,” João Fernandes informa ba TATOLI.
Notísia relevante: Delegasaun hosi nasaun tolu la partisipa Jogu CPLP XII
Nia haktuir katak maski viajen dook maibé prontu partisipa iha eventu internasionál ne’e no kompromitidu atu hatudu prestasaun di’ak iha modalidade hotu ne’ebé Angola sei partisipa ba.
“Ami iha modalidade sia no atleta hamutuk 52,” João akresenta.
Iha fatin hanesan, Diretora Jerál Desportu São Tome e Príncipe, Jorzita de Sousa Teixeira hato’o sentimentu orgullu tanba konsidera Timor-Leste nia klima hanesan ho São Tome e Princípe no naturalmente furak.
“Aviaun mak tarde hafoin kanseladu iha oras balun maibé situasaun di’ak hotu,” Jorzita haktuir.
Husi totál delegasaun hirak-ne’e, voo dahuluk transporta jogadór sira ho nia komitiva hamutuk 122 kompostu delegasaun Angola na’in-33, Cabo-Verde 19, São Tome e Príncipe 32 no Moçambique 38.
Enkuantu, voo daruak hamutuk 137 kompostu husi nasaun rua hanesan Angola hamutuk na’in-73 no Cabo-Verde 64. Delegasaun hirak-ne’e ho Aero Dili ho numéru flight A319.
Delegasaun referida aranka husi Aeroportu Internasionál I Gusti Ngurah Rai Denpasar, Bali, iha tuku 14:30 oras Indonézia osidentál (WIB-sigla Indonézia) no durante oras 01:38 iha viajen.
Tuir observasaun TATOLI iha terrenu, hafoin delegasaun husi kontijente Áfrika to’o iha aeroportu, simu husi Komisaun Organizadora, iha-ne’ebé atleta ho ofisiál hirak-ne’e diretamente ba fatin destinadu antes partisipa albertura iha Estádiu Munisipál Dili.
Jornalista: Natalino Belo
Editór: Xisto Freitas da Piedade
