Autoridade Ossoala solisita Governu aselera konstrusaun estrada rurál
DILI, 19 Jullu 2025 (TATOLI)–Autoridade suku husu Governu sentrál atu aselera implementasaun projetu konstrusaun estrada husi Fundu Verde apoiadu United Nations Development Programa (UNDP-sigla ingleza) iha Suku Ossoala, Postu Administrativu Vemasse, Munisípiu Baukau.
Xefe Suku Ossoala, Francisco Gama da Costa Lobo, esplika projetu ne’e parte tékniku finaliza ona levantamentu dadus no relata ona ba Gabinete Vise Ministru-Primeiru no Ministru Koordenadór Asuntu Ekonomia iha fulan-Juñu liubá maibé to’o atualmente seidauk finaliza burokrasia tanba bele fó impaktu ba prosesu implementasaun.
“Ami hanesan autoridade husu ba Governu atu aselera serbisu burokrasia nune’e munisípiu bele kontinua prosesu konkursu públiku tanba komunidade Ossoala hakarak halais estrada ne’e,” Xefe Suku Ossoala informa ba TATOLI liuhosi telefónema, Sábadu ne’e.
Notísia relevante: Parseiru dezenvolvimentu sei apoia reabilitasaun estrada rurál iha Ossoala
Lobo relata parte téknika husi liña instituisaun sira finaliza ona halo levantamentu dadus, dezeñu tékniku, kontajen Bill of Quantities (BoQ), karta autorizasaun ambientál husi ANLA, Diresaun Jerál Turizmu no Ambientál husi Ministériu Turizmu no Ambientál (MTA).
Nia salienta katak autoridade sira hein de’it aseitasaun nune’e parte munisípiu bele loke prosesu konkursu tanba prosesu hotu submete ona ba Gabinte Vise Primeiru-Ministru Asuntu Ekonomia hodi hetan aseitasaun tanba projetu referidu iha deadline to’o fulan-Setembru.
“Ita hein de’it ona prosesu ikus husi Vise Primeiru-Ministru I atu asina dokumentu sira-ne’e nune’e bele hahú loke konkursu, se lae to’o Agustu-Setembru projetu ne’e sei kanseladu,” Lobo informa.
Autoridade lokál preokupa projetu referidu kanseladu tanba konsidera projetu ne’e sei rezolve preokupasaun no sei benefísia komunidade iha-ne’ebé estrada ne’e sei liga Suku Ossoala bá Uatulari ho distánsia kilómetru tolu-resin.
Entretantu, Fundu Verde husi UNDP implementadu iha munisípiu neen kompostu husi Ermera, Aileu, Ainaru, Vikeke, Lautein no Baukau, iha-ne’ebé Suku Ossoala no Uatulari, Postu Vemasse nu’udár alvu projetu konstrusaun estrada ho totál orsamentu hamutuk rihun $300-resin.
Jornalista: Natalino Belo
Editór: Xisto Freitas da Piedade
