DILI, 19 Jullu 2025 (TATOLI) – Laloran entuziasmu no espíritu nasionalizmu hakonu Estádiu Munisipál Dili, ohin, iha serimónia ofisiál ba abertura Jogu Komunidade País Ko’alia Lian Portugés (CPLP, sigla portugés) Edisaun da-12.
Dezde iha tuku 13h00 loraik, ema rihun ba rihun hahú hakbesik ba iha área estádiu nian, iha ambiente ida vibrante no nakonu ho sentimentu forte ho espíritu nasionalizmu. Adeptu sira, ho emosionadu, hatudu nia apoiu inkondisionál ba selesaun Timor-Leste no ba país irmaun CPLP sira.
Kores bandeira nasionál Timor-Leste, akompaña mós bandeira husi Estadu-membru CPLP sira – hanesan Brazíl, Angola, Kabu Verde, Mosambike, Portugál no seluk tan – domina atmosfera, forma uniaun iha diversidade no fraternidade, simboliza lasu istóriku no kultura ne’ebé forte entre nasaun membru sira.
Serimónia abertura ne’e hahú ho aprezentasaun vibrante múzika tradisionál timoroan nian, interkalada ho performa kulturál nasaun membru CPLP sira seluk. Audiénsia responde ho entuziasmu, kanta hamutuk no basa-liman, iha momentu forte ho envolvimentu emosionál husi eventu ne’e rasik.
Ambiente sai solene liután bainhira Padre Indra do Nascimento, Prezidente Komisaun Nasionál Juventude Katólika iha Timor-Leste, dirije orasaun ida hodi marka ofisiál inísiu husi eventu ne’e.
Depoizde ne’e, estádiu filafali enxe ho enerjia ho entrada atleta sira husi nasaun partisipante neen. Kada delegasaun lori sira-nia bandeira, simu ho basa-liman maka’as husi sikun hotu-hotu iha tribun ne’ebé nakonu. Prezente iha eventu ne’e atleta 511 husi Angola, Kabu Verde, Mosambike, Portugál, Saun Tomé no Prínsipe, no mós uma-na’in Timor-Leste. Iha edisaun ne’e Brazíl, Giné Ekuatoriál no Giné-Bisau la partisipa.
Momentu ida markante liu iha serimónia ne’e mak bainhira banda militár husi Forsa Defeza Timor-Leste (F-FDTL) toka inu nasionál, “Pátria, Pátria”. Estádiu tomak hamriik no hananu ho entuziasmu, kria momentu ida nakonu ho orgullu nasionál.
Ba povu timoroan, abertura Jogu CPLP reprezenta la’ós de’it hanesan serimónia desportiva ida. Ne’e nu’udar afirmasaun identidade nasionál no símbolu pertense ba komunidade luzófona. Dili transforma ba episentru espíritu koletivu ida, halibur sidadaun husi klase hotu-hotu iha ambiente selebrasaun no alegria ne’ebé fahe ba malu.
Iha biban ne’e, reprezentante atleta no árbitu sira halo sira-nia juramentu. Sira promete katak kompete ho respeita no kumpre regra jogu nian, enkuantu árbitu sira kompromete ezerse funsaun ho profisionalizmu durante eventu ne’e la’o.
Notísia relevante: Jogu CPLP nu’udar símbolu solidariedade no amizade entre nasaun luzófona
Jornalista: Arminda Fonseca
Editora: Maria Auxiliadora
