FXTL prepara árbitru nasionál Xadrez ba Jogu Desportivu CPLP XII
DILI, 19 Jullu 2025 (TATOLI) – Federasaun Xadrez Timor-Leste (FXTL) hala’o ona formasaun atualizasaun (refreshing) ba árbitru nasionál nian hodi dirije Modalidade Xadrez iha Jogu Desportivu CPLP ba dala 12, ne’ebé sei hala’o iha loron 21 fulan Jullu.
Sekretáriu Jerál FXTL, Joviano Salves Reis dehan atividade ne’e krusiál atu garante kualidade no integridade jogu xadrez ne’ebé hala’o iha eventu internasionál ne’e.
“Jogu CPLP ne’e importante.Ita-nia árbitru nasionál sira presiza reforsa sira-nia preparasaun materiál, inklui téknika no prosedimentu jogu nian tuir padraun FIDE (Federasaun Internasionál Xadres) nian.Ida-ne’e atu garante katak jogu hotu-hotu la’o ho di’ak no justu”, Joviano dehan ba TATOLI iha Universidade Nasionál Timor Lorosa’e (UNTL), sabadu ne’e.
Tuir Joviano, dezde 2015, FXTL hetan apoiu formasaun hosi ekipa internasionál sira, nune’e Timor-Leste agora iha ona árbitru sertifikadu hosi FIDE na’in 20 ho nivel internasionál no iha kapasidade hodi dirije jogu nasionál no internasionál sira. Maski nune’e, árbitru balun de’it, hanesan Prezidente FXTL, mak iha esperiénsia internasionál.
“Jogu CPLP hanesan oportunidade diak ida, la’ós de’it ba atleta sira atu hatudu sira-nia abilidade, maibé mós ba ita-nia árbitru sira hodi hetan esperiénsia internasionál”, Nia hatutan.
Durante Jogu Desportivu CPLP, jogu xadrez sei dirije hosi kombinasaun árbitru nasionál no internasionál. Aleinde árbitru nasionál FIDE nian na’in ualu hosi Timor-Leste, árbitru apoiante sira hosi Portugál, São Tomé no Prínsipe, no Cabo Verde hamutuk nain haat mós sei iha hodi dirije.
Árbitru sira-ne’e sei hala’o knaar hahú hosi inísiu kompetisaun nian to’o remata, tantu iha meza no iha ekipa fair play nian, hodi garante integridade hosi jogu sira, inklui asegura katak laiha partisipante ida maka uza material sira ne’ebé bandu hanesan telemovel, oklu ka material eletróniku sira seluk.
Aleinde atualizasaun ba árbitru sira, FXTL sei komemora mós Loron Internasionál Xadrez nian iha loron 20 fulan-jullu iha Centro de Convenções de Díli (CCD). Komisaun ne’e prepara ona atividade oioin, inklui demonstrasaun no simulasaun jogu husi Mestra Feto FIDE ida husi Portugál, hamutuk ho jogadór joven Timor-Leste sira.
“Ida ne’e hanesan momentu oportunu atu introdús no avansa kultura xadrez iha Timor-Leste,” Joviano konklui.
Jornalista : Cidalia Fátima
Editora : Armandina Moniz
