Timor-Leste derrota 0-1 kontra Portugál iha Jogu CPLP
DILI, 19 Jullu 2025 (TATOLI) – Selesaun sub-16 Timor-Leste falla akumula pontu tolu iha jogu abertura modalidade futeból kontra Portugál, tanba lakon ho golu 0-1, iha jogu ne’ebé hala’o iha Estádiu Munispál Dili, sábadu ne’e.
Iha minutu dahuluk hafoin apitu inisiál, apezarde kondisaun udan, ekipa rua halo joga ho estratégia no fó presaun ba malu liuhusi kontra-atake, maibé laiha oportunidade atu marka golu.
Ekipa Portugál ne’ebé treinadu husi Pedro Silva konsege domina bola ho presaun altu, maibé ekipa juvenil Timor-Leste ne’ebé komanda husi sul-koreanu, Kim Shim Hwan, aposta iha estratégia kontra-atake.
Timor-Leste hetan oportunidade di’ak iha minutu 23 liuhusi xuta besik iha área penalidade Portugal ni’an, maibé la konsege hatama golu, tanba bola kona de’it iha poste baliza ni’an.
Ekipa rua termina jogu iha primeira parte ho rezultadu 0-0.
Tama ba segunda parte, Portugál hetan oportunidade di’ak atu marka golu iha minutu 59 liuhusi bola falta, maibé oportunidade ne’e la konsege konverte ba golu.
Iha minutu 85, Portugál konsege marka golu desizivu husi jogadór Guilherme Sousa liuhusi xuta bola falta, besik área penalidade Timor-Leste ni’an.
Portugal lidera 1-0 to’o tempu normál termina.
Ho rezultadu ne’e Portugál konsege xave pontu tolu dahuluk, no prepara ba jogu tuir mai kontra adversáriu Angola iha tersa-feira no Timor-Leste buka atu manán iha jogu tuir mai kontra Cabo Verde ne’ebé ajendadu ona iha segunda-feira.
Notísia relevante: Delegasaun hosi nasaun tolu la partisipa Jogu CPLP XII
Jornalista: Afonso do Rosário
Editora: Isaura Lemos de Deus
