DILI, 20 Jullu 2025 (TATOLI)—Prezidente Federasaun Xadrez Timor-Leste, Zeferino Viegas Tilman, hateten iha jogu desportivu Comunidade dos Países da Língua Portuguêsa (CPLP) edisaun ba da-XII, federasaun selesiona ona atleta nain-haat ne’ebé kompostu husi feto na’i-rua no mane na’in-rua hodi kompete.
Notísia Relevante: Entuziasmu públiku marka abertura Jogu CPLP iha Dili
Prezidente Federasaun Xadrez Timor-Leste (FXTL), Zeferino Viegas Tilman, afirma molok prepara ba kompetisaun CPLP, sira halo selesaun ba jogadór ho idade 17 ba kraik, husi kada eskola ne’ebé mak eziste iha timor laran tomak, liu-liu ba sira-ne’ebé mak durante ne’e ativa iha eventu modalidade xadrez nian.
“Nune’e iha selesaun ne’e ita konsege hetan duni atleta selesionadu nain-haat, mane rua no Feto rua. Maske atleta seluk ne’ebé hola parte iha selesaun ne’e hetan klasifikasaun datolu, maibé sira akompañia kolega nain-haat ne’e iha sentru treinamentu,” Prezidente ne’e informa ba Agência Tatoli iha kampus sentrál UNTL, Kaikoli, kinta (17 Jullu 2025) ne’e.
Prezidente ne’e esplika, husi atleta nain-haat ne’e sei kompete ba klase rua mak hanesan xadrez standar no ida seluk xadrez blitz, enkuantu atleta rua seluk sei joga nu’udár ekipa, ne’ebé sei hamutuk hasoru nasaun sira seluk no joga ba eventu rapid.
“Ekipa Timor-Leste iha Jogu CPLP ba modalidade Xadrez mak hanesan, Rivano Viegas (estandar Masculino no Blitz), Lizete de Sousa (estandar Femenino no Blitz), Noelio Garcia Menezes (Rapid), Amelia Aleixo da Costa Castora (Rapid)”, nia mensiona.
Konteudu jogu xadrez
Xadrez Padraun (estandar- Klásiku): Kontrolu tempu nian bele varia tebes, maibé normalmente envolve períodu tempu ne’ebé naruk tebes ba jogadór ida-idak, dala barak oras ida ka liu, no mós oras barak ba jogu kampionatu nian.
Xadrez Lalais (Rapid): Tempu jogu nian badak liu duké xadrez padraun, normalmente entre minutu 10 no 60 ba jogadór ida.
Xadrez Blitz: Tempu jogu nian badak tebes, normalmente entre minutu 3 no 10 ba jogadór ida.
“Entaun atleta nain-haat ne’e kuaze iha ona esperénsia tuir kompetisaun iha rai-laran, atleta ida mak iha ona rating rasik ho 1600 liu tuir sistema Federasaun Internasionál ba Xadrez (FID), nain-tolu seluk seidauk iha rating, maibe sira hotu joga beibeik ona hanesan iha tinan 2023. Kampeanatu Nasionál iha Xanana Sport Center, sira mós joga hotu no treinu kontinua to’o iha selesuan sira tama ba sentru treinamentu,” nia esplika.
Nia informa, agora daudaun atleta sira preparadu ona atu kompete, hein katak sira bele hatudu rezultadu di’ak ba ita hotu nia esperansa no bele manán netik medalla iha jogu ne’e
Entretantu iha modalidade xadrez, Timor-Leste sei hasoru nasuan konfirmadu lima mak hanesan Portugál, Mosambike, Cabo Verde, Angola ho tan São Tomé e Prinsipe. Kada nasaun ida haruka de’it Atleta rua, feto ida no mane ida, tanba kestaun distánsia no orsamentu.
Jornalista : Alexandra da Costa
Editór : Cancio Ximenes
