DILI, 20 Jullu 2025 (TATOLI)—Jogu Desportivu Komunidade País Lian Portugés (CPLP, sigla portugés) ba dala-XII, modalidade Voleiból Praia hahú jogu ba loron dahuluk nia, iha Domingu ne’e, iha kampu Bidau Lesidere.
Ekipa eskalaun feto Grupu A, husi nasaun Cabo-Verde (A1) joga hasoru Mozambike (A2), hahú jogu iha tuku 09:00 dadeer ne’e.
Jogu ne’e árbitru husi Gomes no Evaristo, ho jogadora husi Cabo-Verde kompostu husi Catalina no Maria no jogadora Mozambike Auria no Alaima Ama Mahumane.
Jogu ba set dahuluk, jogadora husi Mozambike nia tátika konsege domina nia adversáriu ho pontu 24-22.
Notísia relevante : Jogu voleiból praia maskulinu: Mosambike halakon Angola
Iha set daruak nian ne’ebé mak hahú husi tuku 09:25, jogadora husi Cabo-Verde duni pontu husi jogadora Mozambike, konsege to’o pontu 21-11. Iha pontu ikus, jogadora Mozambike konsege manán Cabo-Verde ho pontu 15-13.
Nune’e, Mozambike mak manán jogu ho modalidade Voleiból Praia ba eskalaun feto.
Jogadora Mozambike, Alaima Ama Mahumane, sente kontente tanba bele manán iha jogu dahuluk ne’e.
“Jogu ohin ne’e difísil tebes maibé ekipa bele ultrapasa faze ida-ne’e. Ami kontente maibé ida-ne’e la’ós fasil. Ami-nia esperansa mak ohin bele manán primeiru lugar,” nia katak.
Alaima Ama Mahumane konsidera jogu ne’e espetakulár no amizade tebes, no hakarak bele kontinua jogu ne’e iha futuru hodi hametin amize iha país luzófonu.
Jornalista : Osória Marques
Editora : Julia Chatarina
