Governu lansa ona fatuk-inan ba Ponte Sana Uatulari
VIKEKE, 21 Jullu 2025 (TATOLI)—Governu liuhusi Ministériu Obra Públika (MOP), Segunda ne’e, lansa ona fatuk-inan dahuluk ba Ponte Sana lokalizadu iha Aldeia Sana, Suku Uaitame, Postu Administrativu Uatulari, Munisípiu Vikeke.
Diretór Servisu MOP Munisípiu Vikeke, Casildo Gomes haktuir katak foin lalais ne’e MOP halo ona lansamentu ponte ida iha Aldeia Sana ne’ebé durante ne’e difikulta movimentu populasaun sira-nian liuliu iha tempu udan.
“Foin lalais iha Sabádu (19 fulan-Jullu), ita-nia Ministru Obra Públika direta halo lansamentu ona ba Ponte Sana hodi halo konstrusaun,” Casildo Gomes ba TATOLI iha ninia kna’ar fatin, Beloi.
Notísia relevante: MOP sei konstrui ponte permanente lima
Diretór ne’e dehan obra referida konstrui husi kontratór Zina husi Empreza MCC 20 Grupu Corp, LTD, liuhusi prosesu konkursu ho númeru 00/MOP-2024, totál orsamentu ba obra ne’e hamutuk 3.175.321,63, ho durasaun servisu fulan ualu (8).
“Ha’u fiar katak kuandu konstrusaun ponte ne’e ramata sei fasilita ita-nia komunidade Sana (Uaitame) asesu ba merkadu, fasilidade saúde no asesu ba eskola,” nia subliña.
Ponte Sana ne’e lansa direta husi Ministru Obra Públika, Samuel Marsal no akompañadu husi Ministru Agrikultura Peska, Pekuária, Floresta, Marcos da Cruz, autoridade lokál no komunidade Postu Uatulari.
Jornalista: Vitorino Lopez da Costa
Editór: Xisto Freitas da Piedade
