DILI, 21 Jullu 2025 (TATOLI) – Ekipa volei praia femenina husi Portugál kontinua hatudu sira-nia dezempeñu hodi alkansa vitória iha kompetisaun ohin hasoru Kabuverde.
Atleta portugeza, Inês Silva no Matidel Silva, la fó pontu fraku ba jogadora husi Kabuverde Catarina Fonseca no Maria Clara Lima, atu manán iha jogu ne’e.
Iha set dahuluk iha kompetisaun ne’e, ekipa Portugál hetan pontu 21 kontra Kabuverde 10. Iha set daruak, jogadora kabuverdiana tenta uza tátika oioin atu hasa’e pontu hodi aprosima Portugál, maibé selesaun portugeza rua ne’e la fó pontu fraku hodi kontinua manán no termina set ne’e ho 21-17.
Hafoin jogu termina, jogadór Portugál Inês Silva dehan ba Tatoli katak kompetisaun ne’e la’o di’ak tebes no sira kontente tanba manán tan iha jogu loron daruak nian.
“Ami mai la’ós reprezenta indivíduu, maibé nasaun. Ami iha espersansa no fiar katak sei manán hodi lori medalla osan mean ba ami-nia país”, nia garante.
Iha sorin seluk hanesan, jogadór Catarina Fonseca husi Kabuverde, triste ho rezultadu tanba lakon hasoru Portugál.
“Joga kontra Portugál difísil oituan tanba Portugál hatudu duni sira-nia forsa, maibé ida-ne’e hanesan esperiénsia ida ba ami, oinsá ami esforsu an hakat ba jogu tuirmai”, dehan.
Tuir observasaun Tatoli iha terrenu, jogu loron daruak ba modalidade voleiból praia ne’e públiku kontinua entuziasmu asiste jogu to’o ramata, no hetan seguransa másima husi Polísia Nasionál Timor-Leste.
Notísia relevante: Timor-Leste sofre derrota hasoru Portugál iha volei praia mistu
Jornalista: Arminda Fonseca
Editora: Maria Auxiliadora
