DILI, 20 Jullu 2025 (TATOLI) – Ekipa husi Portugál manán Timor-Leste iha jogu ho modalidade volei praia mistu, ne’ebé realiza iha Lesidere, Dili, hanesan parte ida husi Jogu Desportivu Komunidade País Ko’alia Lian Portugés (CPLP).
Jogu iha kategoria mista ne’e, Timor-Leste reprezenta husi Miguelia Pereira Ximenes (1) no Noeh Deo Gracias Viegas (2), enkuantu Portugál konta ho Matilde Silva (1) no Luís Filipe (2).
Iha inísiu kompetisaun ne’e Timor-Leste komesa ho marka uluk pontu ida. Enkuantu, Portugál la nonook hodi hatudu nia ritmu jogu ne’ebé di’ak ho atake estratéjiku, no taka set dahuluk ho pontu 21 no Timor-Leste 7.
Iha parte daruak nian, Timor-Leste tenta atu reaje hasa’e pontu, maibé dupla mista Portugál mantein hatudu sira-nia jogu hodi hamonu uma-na’in ho pontu 21 no 12, garante vitória ho set 2-0.
Depoizde jogu hotu, atleta voleiból praia Noeh Deo Gracias husu deskulpa ba públiku tanba lakon iha estreia ekipa mista ne’e.
“Ami tenta hakarak manán maibé iha jogu mistu ne’e ha’u-nia parseira Miguelia kolen, tanba ohin nia jogu set tolu. Maibé ami iha esperansa sei bele manán iha jogu tuirmai”, Noeh Deo dehan ba Tatoli, ohin.
Nia mós destaka katak maski ho rezultadu ne’ebé iha, motivasaun ba na’in-rua ne’e kontinua maka’as. “Hakarak manán tanba reprezentante nasaun, maibé importante mak tenke hatudu nafatin jogu ho disiplina”, nia dehan.
Iha fatin hanesan, atleta portugés Luís Filipe selebra vitória tanba jogu ohin ne’e iha kategoria femenina, maskulina no mista, Portugál hetan rezultadu di’ak hotu.
“Ami iha esperansa atu sai vensedór, la’ós ba modalidade voleiból praia de’it maibé ba modalidade hothotu hodi lori medalla osan-mean ba Portugál, tanba ami mai lori nasaun nia naran”, nia espresa ho orgullu.
Notísia relevante: Ekipa mane husi Portugál hetan vitória iha jogu voleiból praia
Jornalista: Arminda Fonseca
Editora: Maria Auxiliadora
