DILI, 20 Jullu 2025 (TATOLI) – Kompetisaun voleiból praia iha Jogu Desportivu Komunidade País Ko’alia Lian Portugés (CPLP) ne’ebé hahú ohin iha kampu Lesidere, dupla Portugál manán Kabuverde ho set rua, ho parsiál 21-12 no 21-10.
Atleta na’in-rua husi Portugál Tito ho númeru kamizola 1 no Luís Filipe 2 hasoru nia adversáriu kabuverdianu Denzel Ramos númeru 1 no Micael Barboja 2. Iha set dahuluk, Portugál hatudu domina iha jogu, ho komunikasaun di’ak hodi halo atake iha rede no hasa’e nia pontu.
Maski iha tentativa husi parte Kabuverde, Portugál mantein nia ritmu ho blokeia ne’ebé presiza halo no defeza di’ak, ikus mai taka set dahuluk ho pontu 21-12.
Hafoin intervalu tékniku lalais, set daruak komesa no Portugál nafatin kontrola bola. Dupla portugés ne’e aprezenta konsisténsia hodi pasa bola ba malu, impede nia adversáriu atu hetan espasu para husik bola no hetan pontu. Jogu iha set daruak termina ho pontu 21-10, garante vitória ba Portugál ho set 2-0.
Iha finál jogu, jornalista Tatoli halo entrevista ho atleta voleiból Portugál, Tito nu’udar kapitaun jogu, ne’ebé espresa nia satisfasaun ba rezultadu ne’e. Kapitaun ne’e destaka orgullu tanba reprezenta Portugál iha kompetisaun ne’e.
Tuir nia, jogu ohin ne’e interesante no di’ak tebes, tanba ekipa rua esforsu hotu. Nia dehan sira-nia prezensa iha jogu ne’e hakarak sai manán-na’in iha modalidade voleiból ne’e.
“Buat ida ne’ebé ami na’in-rua hakarak mak saida mak ami konsege halo. No ami hakarak barak. Ami gosta tebes ami-nia rain, no reprezenta tempu sei sai fonte orgullu nian, nune’e ami hamutuk ho ema sira seluk, reprezenta klube ida”, nia dehan.
Atleta ne’e salienta katak durante jogu hasoru Kabuverde sente difísil uituan tanba molok manán parte Kabu Verde mós halo esforsu hotu, luta maka’as “maibé ami fiar katak vitória ne’e ami-nian”.
Iha fatin hanesan Luís Filipe kontente tebes lori nasaun nia naran partisipa iha jogu CPLP. Nia agradese tanba Portugál konsege manán iha jogu ne’e.
Notísia relevante: Voleiból praia maskulinu: Mosambike manán kontra Angola
Jornalista: Arminda Fonseca
Editora: Maria Auxiliadora
