DILI, 21 Jullu 2025 (TATOLI)–Atleta Nasionál Modalidade Taekwondo, Nélio dos Santo falla konkista medalla osan-mean, maibé gaña de’it osan-mutin iha Jogu Desportu Komunidade Nasaun Lian Portugés (CPLP-sigla portugeza) ba dala-XII 2025.
Nélio lakon ho Atleta Portugál, Gustavo Valentim iha finál ho pontu 0:2 liuhosi jogu ronde daruak iha kompetisaun numéru mane kilógrama 55 ne’ebé realiza iha Jináziu Dili, Segunda ne’e.
Notísia relavante: Atleta timoroan na’in-rua hakat bá finál kompetisaun Taekwondo iha Jogu Desportivu CPLP
Hafoin ramata tara medalla, Nélio dos Santos hateten nia parte koko esforsu liuhosi treinu no iha alvu hakarak gaña medalla osan-mean maibé realidade derrota kontra Portugál.
“Hau-nia sentimentu ladún kontente tanba derrota ho Portugál, maibé esforsu sira durante ne’e hatudu rezultadu di’ak tanba bele hakat to’o finál,” Nélio informa ba TATOLI.
Nia kompromete sei esforsu maka’as liután liuhosi treinu nune’e futuru mai bele hasa’e prestasaun no eleva Timor-Leste nia naran iha mundu liuhosi desportu.
Nélio hakat ba finál hafoin halakon atleta husi nasaun Mosambike, Lauren ho totál ronde tolu hanesan volta dahuluk Nélio rekolla skor neen (6 )no Lauren Cristiano tolu (3), daruak atleta Mosambike konsege rekolla pontu 9-3, maibé iha volta datoluk Nélio rekolla skor 4:2.
Entretantu, atleta iha modalidade Taekwondo kategoria mane kilógrama 55 hamutuk nasaun haat kompostu husi Portugál, Angola, Mosambike no Timor-Leste nu’udár uma-na’in iha-ne’ebé kompete iha kategoria haat hanesan kilógrama 46 (feto), 55 (mane), 49 (feto) no 51 (mane).
Jornalista: Natalino Belo
Editór: Xisto Freitas da Piedade
