SMAS entrega osan $200 ba feto vulnerável iha Zumalai
KOVALIMA, 21 Jullu 2025 (TATOLI)- Servisu Munisipál Asaun Sosiál (SMAS) liuhusi programa fortalesimentu emansipasaun sósiu ekonómiku entrega ona osan $200 ba família vulnerável iha postu Administrativu Zumalai, Munisìpiu Kovalima.
Diretór Servisu Munisipál Asaun Sosiál Clementino Bere esplika katak atividade entrega osan ba feto vulnerável 13 ne’e relasiona iha semana-rua ba kotuk funsionáriu husi asaun sosiál halo asesmentu dadus katak feto vulnerável sira ne’e presiza duni fó apoiu.
“Bazeia ba rezultadu asesmentu feto vulnerável 13 husi postu administrativu Zumalai ne’e, ita nia Governu presiza duni fó tulun liuhusi apoiu osan $200 atu hakbi’it sira nia ekonómia uma-laran tanba haree ba sira nia rendimentu ”, Diretór SMAS, Clementino Bere hato’o liuhusi nia diskursu molok entrega ona ba feto vulnerável, iha salaun postu Zumalai, ohin.
SMAS entrega osan liuhusi programa ho naran fortalesimentu ho signifilanka katak Governu hakarak haforsa ekonómia ba feto vulnerável ne’ebé mak durante ne’e laiha kbi’it selu ba oan nia eskola no uza ba nesesidade uma laran.
Dirijente SMAS mós fó hafoin ba feto Vulnerável ne’ebé mak simu ona osan $200 tenke uza ho kuidadu no uza ba nesesidade labele lori ba joga di’ak uza hodi loke negósiu ki’ik hanesan faan mina no pisang goreng.
Iha fatin hanesan, Reprezentante Administradór Postu Administradór Zumalai, Armando da Silva fó hanoin ba benefisiáriu sira osan ne’ebé sira simu atu uza ba nesesidade uma-laran
“ Ita nia Governu fó apoiu vulnerável ita boot sira seidauk hatene nia signifika mak nia preparasaun prepara ai-han ba fulan ida-ne’e menus tanba nia rendimentu la sufisente “ nia dehan
Benefisiáriu Aldeia Biata Suku Faleto, Agostina Lopes hato’o agradese ba Governu apoiu osan $ 200 nune’e hodi uza ba nesesidade uma laran no mos hodi halo negosiu kiik.
“ Osan ne’ebé mak ohin, ha’u simu ha’u uza hodi halo negósiu ki’ik hanesan sosa terigu hodi faan dosi ruma, nune’e osan ne’e atu labele hotu. Se ita simu osan ne’e mak ita la halo negósiu ruma osan simu la too semana bele hotu ona”nia informa.
Jornalista :Celestina Teles
Editór:Florencio Miranda Ximenes
