DILI, 22 Jullu 2025 (TATOLI)-Atleta husi nasaun Portugál, Laura Branco Jorge da Silva Agostinho, sai vensedora ho pontus 5,45, hafoin kontra atleta sira seluk husi nasaun, Kabuverde, Angola, no Timor-Leste iha kompetisaun saltu komprimentu (femenina) modalidade atletismu iha jogu desportivu entre Komunidade Nasaun sira ne’ebé ko’alia lian-portugés (CPLP, sigla portugés).
Segundu lugar nian okupa husi atleta Luzareth da Conceçao Marcos António (Angola) ne’ebé manán ho pontu 4,81 no iha terseiru lugar nian konkore husi atleta Rode Mavinga Filomeno Lutete (Angola) konsege rekolla pontu 4,28.
Tuir atleta vensedora ba klase saltu kumprimentu, Laura Branco Jorge da Silva Agostinho, hateten, nia la fiar-an katak bele manán dala ida-tan iha modalidade atletismu nian, liuliu iha klase saltu kumprimentu.
“Ha’u kontente tebes bele rekolla tan medalla osan mean ida tan, espetakulár tebes bele hetan medalla rua, espera aban bele hetan tan medalla iha kompetisaun kurida mistura nian”, atleta ne’e ba Tatoli iha estádiu munisipál Dili, ohin.
Nia lahaluha agradese ba ninia treinadór no ekipa ofisiál inklui mós nia belun sira ne’ebé sempre fó suporta ba nia durante iha kompetisaun ida-ne’e, tanba ne’e nia mós fó mensajen katak labele para treinu iha ne’e ona maibé nafatin iha esperansa hodi kontinua treinu.
“Ha’u nia preparasaun ba aban nian prontu atu kompete no prontu atu foti tan medalla ida ba Portugál”, nia garante.
Atleta orijen Portugál ne’e simu medalla osan-mean (ouru) ba dala-rua ona tanba iha kompetisaun horisehik nia mós konkista medalla osan-mean ida hafoin kompete iha korida 100 metru (femenina).
Tanba ne’e tuir Tékniku Federasaun Atletismu Portugál (leader), Alcino Pereira louva ninia atleta sira tanba kuazé iha kompetisaun hotu-hotu iha modalidade atletismu nian Portugál konsege konkista medalla osan mean (euro) barak.
“Ida-ne’e mak esforsu husi atleta sira-nia espera iha loron aban sira bele hatudu performe di’ak liután iha kampu, tanba hanesan treinadór ami so fó treinu sira, maibé sira rasik mak tenke esforsu”, tékniku federasaun ne’e espresa.
Tanba ne’e nia mós prontu no konfia katak iha loron aban sira sei kontinua rekolla tan medalla ba nasaun Portugál.
Atleta ne’ebé kompete iha klase saltu kumprimentu mak hanesan, Laura Branco Jorge da Silva Agostinho, husi nasaun Portugál, Luzareth da Conceçao Marcos António no Rode Mavinga Filomeno Lutete husi nasaun Angola, Vanessa Pereira Mendes Morreira, husi nasaun Kabuverde, Chelsia Bolo Soares da Cruz, husi nasaun Timor-Leste.
Notísia relevante: Atleta feto na’in-neen sei kontinua avansa ba faze finál 200 metru
Jornalista : Alexandra da Costa
Editora : Rita Almeida
