“Ha’u gosta ona basketeból desde ki’ik”
DILI, 22 Jullu 2025 (TATOLI)-Kapitaun ekipa basketeból Timor-Leste, José Fernandes dos Santos, hateten gosta ona basketeból desde ki’ik.
“Ha’u desde tinan neen gosta ona basketeból, tanba ha’u haree ema sempre joga basketeból mak motiva ha’u to’o ohin-loron bele hola parte iha jogu eskola CPLP sub-16, ida-ne’e ha’u orgullu no kontente”, José, estudante Canossa Has-Laran Dili ne’e haktuir ba Tatoli hafoin jogu kontra Angola iha Jináziu, kuarta-ne’e.
José Fernandes ne’ebé moris iha Dili, loron 28 Janeiru tinan-2007 haktuir, selesionadu husi ekipa basketeból Brother Food iha fulan-Fevereiru hodi partisipa iha jogu CPLP ba dala XII ne’ebé realiza iha loron 16-27 jullu 2025.
“Ha’u orgullu no kontente tanba primeiraves partisipa jogu nivel internasionál CPLP ne’ebé realiza iha Timor-Leste. Ha’u kontente bele reprezenta ita-nia nasaun hodi jogu desportivu CPLP iha ita-nia rain”, estudante desimu-primeiru ne’e dehan.
Oan ikun husi maun-alin na’in tolu ne’e dehan maski iha jogu primeiru no segundu derota, maibé nafatin orgullu. “Hanesan kapitaun ekipa basketeból Timor-Leste iha jogu desportivu CPLP U16, ami sente orgullu tebes ba jogu ida-ne’e, tanba bele hetan oportunidade jogu. Ba ha’u sente kontente tanba tuir jogu”.
Oan husi Carlito dos Santos no Maria Zoara Fernandes ne’e realsa jogu tuir mai sei esforsu rekolla pontu balun iha modalidade basketeból maski ekipa lakon iha parte fiziku, maibe sei esforsu hetan pontu balun.
Notísia relevante: Ekipa basketeból U-16 preparadu hasoru Angola iha jogu abertura
Jornalista : Natalino Costa
Editora : Rita Almeida
