DILI, 22 Jullu 2025 (TATOLI) – Selesaun sub-16 Kabuverde halakon ekipa uma na’in, Timor-Leste, ho 4-0, iha kontinuasaun torneiu futeból Jogu Desportivu CPLP, ne’ebé hala’o iha tersa-feira ne’e, iha Estádiu Munisipál Dili.
Dezde apitu inísiu, equipa hahú jogu ho tempu intensu no kontra-atake, tanba hakarak garante pontu tolu dahuluk.
Ekipa kabu-verdianu, ne’ebé orientadu husi Rui Costa, sai determinadu ho pase bola no marka golu dahuluk iha minutu hitu husi jodadór Vítor Monteiro.
Hafoin golu ne’e, equipa juvenil Timor-Leste halo tentiva oioin liuhusi kontra-atake, maibé defeza kabu-verdianu kontinua la fó espasu ba jodadór timoroan ameasa guarda rede.
Lakleur de’it, iha minutu 13, jogadór kabu-verdianu António Pedro aumenta vantajen ba 2-0.
Nafatin iha primeira parte, iha minutu 25, Josuelson marka golu datoluk hodi hametin superioridade ekipa vizitante ni’an. Rezultadu 3-0 ne’e matein to’o primeira parte termina.
Hafoin intervallu, -Leste tenta halo reasaun hodi marka golu, maibé falta efikásia no falla iha finalizasaun, la konsege ameasa guarda, tanba defeza Kabuverde ni’an dixiplina tebes hodi impede kualkér atake husi jogadór timoroan.
Ekipa kabu-verdianu mantein kontrolu jogu, domina bola no neutraliza kualkér atake.
Ekipa rua kontinua halo kontra-atake, maibé kabu-verdianu hatudu nia superioridade liu husi domina bola iha meiu kampu.
Iha minuto 84, Kabuverde marka tan golu ida husi Lázaro, númeru 14, hadi muda skore ba 4-0.
Ho vitória ne’e, Kabuverde asegura nia pontu tolu dahuluk iha kompetisaun ne’e, enkuantu Timor-Leste, husi jogu rua, seiduak manán iha torneiu ne’e.
Notísia relevante:Timor-Leste derrota 0-1 kontra Portugál iha Jogu CPLP
Jornalista: Afonso do Rosário
Editora: Isaura Lemos de Deus
