DILI, 22 Jullu 2025 (TATOLI)–Finalista Universidade de Dili (UNDIL) hamutuk 279, Tersa ne’e, simu graduasaun ba dala-XV, iha Terra Santa, Komoro.
Reitór UNDIL, José Agostinho da Costa Belo Pereira, husu graduadu sira atu hakbesik-an nafatin ba universidade hodi asesu ba informasaun bolsa estudu.
“Tanba tinan ne’e ita-nia universidade sei haruka estudante enfermajen na’in-20 bá Koreia, ne’e ba sira-ne’ebé graduadu ona,” Reitór UNDIL informa liuhusi nia diskursu, iha ámbitu serimónia graduasaun.
Nia dehan, ba sira ne’ebé hakarak kontinua eskola, dalan nakloke husi universidade iha Jakarta fó bolsa estudu lima ba dentista atu kontinua ba mestradu.
“Tanba ne’e, alin sira ne’ebé hotu ona, hakbesik mai imi-nia dekanu sira ko’alia, saida mak ita kolabora malu, labele haree ba sé mak iha osan, nia mak asesu, iha asesu ne’e dehan katak matenek hakarak eskola ita buka dalan hodi ba eskola nune’e serví ba rai ida-ne’e,” nia akresenta.
Notísia relevante : UNDIL propoin estudante 1.500 ba tinan letivu 2025
Reitór fó hanoin ba graduadu, tempu ba futuru ne’e importante, nune’e atu fó forsa no kontribuisaun boot ba universidade mak alumni, tanba alumni mak sempre iha fuan ba universidade.
Iha fatin hanesan, Reprezentante graduadu, Martino Soares de Araujo Amaral, hateten, ohin loron espesiál tebes laos de’it atu simu diploma maibe hanesan símbolu legál ba konluzasaun akadémika
“Ohin loron ida ne’ebé marka kapítulu foun ida ba ami-nia moris iha Universidade Dili atu kontinua hadi’a no kontribui ba dezenvolvimentu intelektuál iha rai doben Timor-Leste ho objetivu atu prepara ami hanesan jerasaun atu enfrenta desafiu iha mundu globál no serbisu ho konsiénsia iha sosiedade nia le’et,” nia katak.
Graduadu dehan, prezensa iha loron ne’e ho haksolok maibé momentu ida-ne’e atu reflete mós ba prosesu naruk ne’ebé ultrapasa ona ho esforsu oinoin iha vida akadémiku ohin hetan ona vitória ba esforsu tomak durante ne’e.
“Tanba ne’e toga no sapeo ho kores metan ne’ebé ita uza, sei la formaliza de’it estilu formál, maibé hanesan markasaun importante ida ne’ebé lori ita ba hadi’a ita-nia destinu iha futuru hodi hadi’a ita-nia família no rai doben Timor-Leste,” nia tenik.
Finalista ne’ebé gradua hamutuk 279 husi fakuldade Edukasaun, Ekonomia, Direitu, Enjeñaria, Siénsia Polítika no Saúde.
Jornalista : Osória Marques
Editora : Julia Chatarina
