iklan

EDUKASAUN, HEADLINE

UNDIL propoin estudante 1.500 ba tinan letivu 2025

UNDIL propoin estudante 1.500 ba tinan letivu 2025

Logotipu UNDIL. Imajen/Espesiál

DILI, 13 janeiru 2025 (TATOLI)–Universidade Dili (UNDIL) propoin ona estudante foun hamutuk 1.500 ba tinan akadémiku 2025, ba fakuldade neen.

“Tinan ida-ne’e ami presiza estudante ho númeru boot tanba kada tinan ita gradua mós estudante ho númeru boot, entaun daudaun ne’e 500-resin ne’ebé mak rejistu ona, maibé ami-nia alvu ne’e 1.500 ba tinan ida-ne’e,” Komisaun Organizadora, Alfredo dos Santos, informa iha ninia knaar fatin, Mascarinhas, segunda ne’e.

Nia dehan, rejistrasaun la’o hela maibé númeru estudante seidauk to’o númeru ne’ebé UNDIL propoin, nune’e rejistrasaun sei kontinua to’o fevereiru ne’e nia rohan.

“Rejistrasaun ne’e ami hahú iha fulan-setembru liubá no agora kontinua hela no sei ramata iha fim fevereiru, tanba númeru estudante ne’ebé daudaun rejistu seidauk to’o númeru ne’ebé ita propoin. Ne’ebé fulan-fevereiru taka, fulan-marsu tuir orientasaun no kontinua kedas ba prosesu aprendizajen,” nia informa.

Notísia relevante : Finalista UNDIL 500 Gradua iha dezembru 

Orientasaun sei hamosu atividade sientífiku ba estudante foun sira. Situasuan ne’e muda tanba dinámiku ne’ebé mosu iha situasaun jerál.

“Orientasaun mai ne’e fó koñesimentu jerál de’it, liu-liu kona-ba fasilidade, atividade sira ne’ebé ita sei halo no semináriu sientífiku ba estudante sira, no la’ós ona semi militár no PNTL sira iha tempu uluk liubá, tanba ida-ne’e la’ós tempu ona,” Alfredo dos Santos, katak.

Vise-Reitór Asuntu Administrasaun Jerál, Rekursu Umanu, Materiál Finansa UNDIL, Tomas Augusto Correia, hateten, kritéria tama iha UNDIL hanesan baibain, ne’ebé kada estudante mai lori ho osan inskrisaun, prense formuláriu husi komisaun simu estudante foun, fotokopia diploma no deklarasaun legalizada husi diretór eskola, fotokopia kaderneta eskolár, fotokopia sertidaun RDTL ou batizmu nia, fotografia meiu korpo, no fotokopia eleitorál ou billete identidade.

“Kritériu hirak ne’e mak baibain ita uza hodi simu ita-nia estudante foun sira,” nia katak.

UNDIL iha fakuldade neen hanesan fakuldade Ekonómia, Direitu, Siénsia Polítika, Siénsia Saúde, Edukasaun no Fakuldade Tekniku, ho nia departamentu 12.

Enkuantu totál estudante ne’ebé daudaun ne’e ativu hamutuk 7.000 dosente 215.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!