DILI, 22 Jullu 2025 (TATOLI)—Governu liuhosi Sekretaria Estadu Komunikasaun Sosiál (SEKOMS), Tersa ne’e, apoia orsamentu ba Asosiasaun Jornalista haat iha Timor-Leste kompostu husi Asosiasaun Jornalista Timor-Leste (AJTL), Asosiasaun Rádiu Komunidade Timor-Leste (ARKTL), Timor-Leste Press Union (TLPU) no Uniaun Profisaun Jornalista Timor-Leste (UPJTL).
Sekretáriu Estadu Komunikasaun Sosiál, Expedito Loro Diaz Ximenes esplika apoia orsamentu ba asosiasaun hirak-ne’e ho objetivu atu kapasita jornalista sira iha área formasaun tuir ida-idak ninia programa no atividade hanesan literásia mediátika, kombate hoax iha rede sosiál, kapasita membru sira iha reportanjen investigativu no aumenta koñesimentu tuir dezenvolvementu teknolojia Artificial Intelligence (AI).
“Ita hotu hein katak apoia ne’ebé Governu atribui bele fó kapasitasaun ba jornalista sira no juventude,” Expedito hateten iha Palácio do Governo.
Iha fatin hanesan, Prezidente TLPU, Cândido Alves hateten Governu ho jornalista iha misaun ida kona-ba kombate hoax, nune’e ho apoia orsamentu ne’e bá-oin sei sei serbisu hamutuk entre parte rua liuhosi atividade no programa kona-ba kombatente informasaun falsa.
“Lialoos tenke maihosi jornalista maibé tenke iha apoia husi ukun-na’in sira nune’e ita bele hamenus kona-ba lia falsa,” Cândido argumenta.
Entretantu, Governu aloka orsamentu hamutuk rihun $29.982 ne’ebé kada asosiasaun hanesan Asosiasaun Jornalista Timor-Leste (AJTL) $8.282, Asosiasaun Rádiu Komunidade Timor-Leste (ARKTL) $7. 560, Timor-Leste Press Union (TLPU) $7.180 no Uniaun Profisaun Jornalista Timor-Leste (UPJTL) $6.960.
Jornalista: Natalino Belo
Editór: Xisto Freitas da Piedade
