DILI, 22 Jullu 2025 (TATOLI)—Ekipa mista husi Timor-Leste manán ho set rua kontra nia adversáriu Kabuverde iha modalidade Voleiból Praia Jogu Desportivu Komunidade País Lian Portugés (CPLP, sigla portugés), loron datoluk nian, nune’e ekipa ne’e hakat ba semi-finál.
Iha jogu mista ne’e ekipa rua halo esforsu iha kampu, maibé ikus mai Timor-Leste hetan vitória ho 2a0. Set dahuluk Timor-Leste 21 no Kabuverde 13, set daruak Timor-Leste 21 no Mosambike 6.
Àrbitu ba jogu ne’e Claudia Pinto, atleta husi Kabuverde maka Denzel Ramos no Catarina Fonseca, enkuantu husi Timor-Leste maka Noeh Siqueira no Miguela Pereira Ximenes.
Atleta husi Timor-Leste, Noe Siqueira garante sei aprezenta jogu di’ak liután iha faze tuir mai.
“Rezultadu ne’ebé hatudu ohin loron ne’e pozitivu ba aban nian. Tanba ami espera katak ami sei gaña iha finál, nune’e ami lori medalla ba Timor-Leste ho ami-nia rezultadu iha kampu,” Atleta informa ba Ajénsia TATOLI, iha kampu Bidau-Lesidere, Tersa ne’e.
Notísia relevante : Portugál avansa ba semifinál voleiból mistu
Ba jogadór ne’e, ekipa tenke sólidu no tenke iha komunikasaun di’ak entre jogadór no treinadór.
“Importante ba ekipa Timor-Leste mak presiza hadi’a komunikasaun iha kampu laran, servis, ida-ne’e mak ami prepara di’ak, fiar katak sei manán vitória iha finál,” nia akresenta.
Rezultadu apuramentu modalidade Voleiból Praia :
- Grupu A ekipa mane, Timor-Leste jogu dala-rua manán dala-rua ho skore 4 klasifikasaun 1, Mosambike jogu dala-rua manán dala-ida ho skore 3 klasifikasaun 2, Angola jogu dala-rua maibé la manán 0 ho klasifikasaun 3.
- Grupu B ekipa Portugál jogu dala-rua manán dala-rua ho skore 4 klasifikasaun 1, Kabuverde jogu dala-rua manán dala-ida ho skore 2 klasifikasaun 2, São Tomé no Príncipe jogu dala-rua maibé la manán 0 ho skore 0 no klasifikasaun 3.
- Grupu B ekipa feto Portugál jogu dala-tolu manán dala-tolu ho skore 6 klasifikasaun1, Timor-Leste jogu dala-tolu manán dala-tolu lakon dala-ida ho skore 5 no klasifikasaun 2, Mosambike jogu dala-tolu manán dala-ida ho kalon 2, skore 3 no klasifikasaun 3, Kabuverde jogu dala-tolu manán 0 lakon dala-tolu ho skore 1 klasifikasaun 4.
- Grupu A ekipa mista Portugál jogu dala-tolu manan dala-tolu ho skore 6 klasifikasaun 1, Timor-Leste jogu dala-tolu manán dala-rua lakon dala-ida ho skore 4 klasifikasaun 2, Mosambike jogu dala-tolu lakon dala-ida, lakon dala-rua ho skore 3 klasifikasaun 3. Kabuverde jogu dala-tolu manán 0 lakon dala-tolu ho skore 1 klasifikasaun 4.
Oráriu ba modalidade Voleiból Praia : Kuarta (23/07) tuku 09:00, jogu mane Timor-Leste hasoru Kabuverde, enkuantu jogu feto Portugál hasoru Kabuverde.
Iha tuku 10:00, ekipa mane husi Portugál no Mosambike ho ekipa feto mak Timor-Leste no Mosambike.
Iha tuku 16:00, ekipa mista husi Portugál ho Kabuverde no ekipa mista Timor-Leste no Mosambike.
Jornalista : Osória Marques
Editora : Julia Chatarina
