Portugál avansa ba semifinál voleiból mistu

DILI, 22 Jullu 2025 (TATOLI) – Selesaun mista voleiból praia husi Portugál kontinua domina kompetisaun iha Jogu Desportiva Komunidade Ko’alia Lian Portugés (CPLP), depois garante vitória kontra Mosambike hodi hakat ba semifinál.

Portugál manán set rua iha jogu mistu ne’e: 21-9 iha parte dahuluk no 21-8 iha daruak. Dupla portugés komposta husi Luís Filipe no Matilde Silva hatudu domíniu tékniku no tátiku hasoru reprezentante mosambikanu Arnoldo Nhantumbo no Alima Ama Mahumane.

Hafoin jogu, atleta portugés Luís Filipe afirma katak ekipa preparada no garante manán modalidade voleiból praia.

“Ami mai lori nasaun nia naran. Ami iha esperansa boot sei manán jogu ne’e no lori medalla osan-mean, tanba ami fiar ami-nia an”, dehan.

Iha sorin seluk, atleta mosambikanu Arnoldo Nhantumbo rekoñese sira difísil joga hasoru Portugál. “Portugál nia jogadór mesak forte de’it. Maibé iha esperansa aban sei iha jogu no bele manán. Pelu menus hetan segunda ou terseira klasifikasaun”, nia deklara.

Klasifikasaun jerál faze apuramentu

Tatoli mós konfirma ho komisaun organizadora kona-ba klasifikasaun jerál faze apuramentu ba jogu voleiból praia nian iha kategoria femenina, maskulina no mista :

Ekipa mista:

1.º Portugál – pontu 6

2.º Timor-Leste – pontu 4

3.º Mosambike – pontu 3

4.º Kabuverde– pontu 1

Femenina:

1.º Portugál – pontu 6

2.º Timor-Leste – pontu 5

3.º Mosambike – pontu 3

4.º Kabuverde – pontu 1

Maskulina:

Grupu A: 1.º Timor-Leste – pontu 4; 2.º Mosambike – pontu 3; 3.º Angola – pontu 0.