VIKEKE, 22 Jullu 2025 (TATOLI)—Provínsia Hunan nasaun Xina hahú apoia téknika perfurasaun bee-moos ba komunidade Suku Uma Ki’ik, Postu Administrativu Vikeke Vila, Munisípiu Vikeke.
Iha perfurasaun ne’e, Sekretáriu Asuntu Sosiál Organizasaun Komunitária Munisípiu Vikeke, Acasio de Sousa hateten durante ne’e komunidade Suku Uma Ki’ik enfrenta difikuldade ba bee-moos, maibé ho parseiru sira-nia ajuda hodi halo perfurasaun ba bee-moos, solusiona ona difikuldade referida.
“Ha’u sente perfurasaun bee-moos ba komunidade Suku Uma Ki’ik importante, tanba durante ne’e ita-nia komunidade enfrenta liu difikuldade ba bee. Tan ne’e mak Bee Timor-Leste, Empreza Públika (BTL, E.P.) no Servisu Agua Saneamentu no Ambiente Munisípiu Vikeke kolabora ho Provínsia Hunan hodi halo perfurasaun bee-moos ba komunidade Suku Uma Ki’ik,” Acasio ba TATOLI iha Aldeia Rai Hun, Suku Uma Ki’ik, Tersa ne’e.
Acasio hatutan katak autoridade sei kontinua halo pedidu ba Hunan atu apoia komunidade iha fatin seluk ne’ebé seidauk asesu ba bee-moos.
Notísia relevante: https://tatoli.tl/2025/07/18/komunidade-suku-uma-kiik-kontinua-konsume-bee-mota/
Iha fatin hanesan, Xefe Suku Uma Ki’k, Claudino Amaral haktuir ekipa téknika perfurasaun bee-moos hahú halo perfurasaun, ne’ebé agora daudaun ne’e kontinua servisu to’o hetan bee-moos.
“Molok ekipa téknika sira halo perfurasaun, sira halo teste. Bainhira bee sai tiha ami sei kanaliza ba komunidade no edifísiu eskola rua no postu saúde iha Suku Uma Ki’ik,” nia subliña.
Tuir dadus, populasaun Suku Uma Ki’ik ho totál uma-kain 801, populasaun nain-3.715. Husi númeru ne’e, populasaun 98% asesu ba bee-mota no 2% asesu ba bee-posu ne’ebé komunidade sira ke’e rasik.
Suku Uma Ki’ik kompostu hosi aldeia ualu hanesan Rai-Hun ho uma-kain 54 no populasaun na’in-240, Macadean uma-kain 100 no populasaun na’in-478, Bahabunak uma-kain 103 no populasaun na’in-457, Lua uma-kain 239 no populasaun na’in-1226, Baha Fou uma-kain 62 no populasaun na‘in-307, Aina Ua’in uma-kain 58 no populasaun naiin-252, Maroman uma-kain 70 no populasaun na‘in-309 no Idak Bein uma-kain 101 no populasaun na’in-444.
Entretantu, iha perfurasaun ne’e akompaña husi xefe suku, xefe aldeia, tékniku husi Servisu Água no Saneamentu no apoia husi komunidade Suku Uma Ki’ik.
Jornalista: Vitorino Lopez da Costa
Editór: Xisto Freitas da Piedade
