BOBONARU, 23 Jullu 2025 (TATOLI)—Ekipa Korpu Guarda Floresta (CGF-sigla portugeza) Munisípiu Bobonaru iha tempu badak sei halo operasaun konjunta hodi halo apreensaun ba ai-maran ne’ebé komunidade fa’an ka halo komersializasaun iha dalan ninin parte Postu Administrativu Atabae, Batugadé, Balibó no Maliana Vila.
Koordenadór Floresta, Planta Kafé no Indústria Delegasaun Territoriál Munisípiu Bobonaru, Casemiro Lopez informa katak atuasaun ne’e sei halo bazeia ba orientasaun verbalmente husi Sekretáriu Estadu Floresta iha 11 Jullu liubá tanba komersializasaun ai-maran sein autorizasaun husi Governu ne’e kontra lei.
Nia subliña operasaun ne’e sei envolve mós Polísia Nasionál Timor-leste (PNTL) no líder komunitária sira.
“Ami sei hein sirkular. Ita-nia Sekretáriu Estadu ko’alia ona katak iha tempu badak sei hatuun sirkulár mai atu ita la’o tuir orientasaun ne’ebé mak iha,” nia informa ba jornalista sira iha kna’ar fatin, Tersa ne’e.
Notísia relevante: Sekretáriu Estadu Fernandino orienta CGF kontrola komersializasaun ai-maran iha Batugadé-Balibó
Casemiro haktuir, antes ne’e, Guarda Floresta Munisípiu Bobonaru halo ona sensibilizasaun ho métodu ‘Door to Door’ ba komunidade fa’an-na’in sira iha área balun iha Atabae, Batugadé, Balibó no Maliana atu hapara ona atividade komersializasaun ai-maran.
Nia esplika katak Governu la autoriza komunidade tesi ai-arbiru no halo komersializasaun tanba asaun ne’e sei hamosu rai-halai, inundasaun no degradasaun.
Entretantu, Dekretu-lei Nú. 14/2017 kona-ba Regime Geral Floresta, Dekretu-Lei Nú. 5/2016 kona-ba Sistema Nasionál Área Protejida no mós Dekretu-lei Nú. 6/2020 kona-ba Rejime Juridiku Protesaun Konservasaun ba Biodiversidade, Dekretu-lei Nú. 26/2012 kona-ba Baze Legál Ambiente no Dekretu-lei UNTAET Nú. 19/2000, bandu tesi ai iha área protejida.
Jornalista: Sergio da Cruz
Editór: Xisto Freitas da Piedade
