BOBONARU, 23 Jullu 2025 (TATOLI)—Governu liu husi Autoridade Munisipál Bobonaru fó tempu prazu fulan ida ba negosiante sira iha merkadu lokál Ili-bole hahú husi 21 Jullu to’o 30 Agostu 2025 tenke hamamuk fatin referidu, tanba atividade negósiu iha fatin ne’e okupa espasu públiku no provoka engarrafamentu.
Autoridade Munisípiu Bobonaru fó notifikasaun ne’e bazeia ba Dekretu-lei númeru 33/2008, 27 Agustu iha artigu 4 númeru 3 kona-ba atividade komersiál labele taka estrada públiku no trotoár sira.
Antes ne’e, iha 02 Juñu 2025, Koordenadór Autoridade Munisipál Bobonaru, Celestino Marques, fó ona notifikasaun ho númeru referénsia 02/COR/AM.BOB/VI/2025 ba negosiante sira no determina tempu hahú husi 05 Juñu to’o 03 Jullu atu konstrui hotu ona uma ka fatin ba negósiu, maibé la konsege konkluidu tanba situasaun klima (udan) no vizita illas Kruz Joven iha Suku Oe-leu hahú iha 01-19 Jullu ne’e.
“Maibé, hahú iha 21 Jullu to’o 30 Agostu tenke hamamuk fatin ne’e no laiha tan baraka iha estrada sorin-sorin. Karik to’o 30 Agostu ita-boot sira nafatin halo negósiu iha fatin referidu sei hetan sansaun no ita-boot sira la halo tan negósiu iha fatin ne’e tanba ita-boot sira lakohi koopera ho Governu,” sita karta notifikasaun daruak ne’ebé TATOLI asesu, Kuarta ne’e.
Notísia relevante: Governu presiza tau matan ba mini merkadu Ilibole
Negosiante Merkadu Ili-bole, Suku Oe-Leu, Postu Administrativu Bobonaru, Gilberto da Costa informa katak nia parte prontu koopera ho Governu maibé tenke prepara uluk kondisaun.
Nia dehan to’o agora seidauk bele sobu kioske no uma tanba laiha kbi’it atu konstrui fatin foun.
“Fatin ne’e bele sobu, maibé ami nafatin hela iha-ne’e. Uma seluk laiha. Se temi loos de’it liafuan ida sobu ne’e bainhira mak ami tula rai-henek, tula simenti no ai. Tempu ida hanesan ne’e osan ami hola iha-ne’ebé tanba durante ha’u halo ida-ne’e mós hasai rasik osan,” nia afirma
Aleinde ne’e, negosiante husi Suku Raifun, Postu Administrativu Maliana, Elsa Sose Mau reforsa katak hahú aban bá-oin sira sei sobu rasik-baraka, maibé Governu mós tenke prepara rai atu harii fatin negósiu tanba kondisaun no estrutura rai iha merkadu anteriór ladi’ak.
“Se Governu hakarak muda, ne’e tenke muda. Ami povu labele liu fali Governu. Se hakarak sobu agora tenke dudu rai iha kotuk ne’e halo tetuk fó ami. Tenke fó fali fatin foun mai ami,” nia tenik.
Enkuantu, negosiante sira-ne’ebé daudaun ne’e negósiu iha bazaar referida kuaze 20-resin ne’ebé maihusi Suku Oe-leu, Postu Administrativu Bobonaru no Suku Odomau ho Sku Raifun, Postu Administrativu Maliana.
Jornalista: Sergio da Cruz
Editór: Xisto Freitas da Piedade
