DILI, 23 Jullu 2025 (TATOLI) – Prezidente Federasaun Tenis Timor-Leste, João José Madeira Martires, rekoñese katak maske modalidade tenis Timor-Leste kompete hasoru ninia adversáriu sira no rezultadu lakon iha loron dahuluk to’o mai loron datoluk, maibé atleta sira manan iha esperiénsia.
“Ita manan esperiénsia. Husi modalidade tenis, ita manan esperiénsia husi jogadór internasionál sira. Jeralmente, sira joga iha ne’e torneiu entre ita ho ita de’it, ne’e la’ós esperiénsia di’ak ba sira nu’udar jogadór mas ba ami hotu nu’udar organizasaun, treinadór mós aprende esperiénsia husi sira ,” João José Madeira nia dehan ba jornalista sira iha Kampu tenis, UNTL sentrál, ohin.
Notísia relevante:Lakon ho Angola, Tenista feminina Timor-Leste hamonu matan-been
Autoridade másima federasaun ne’e mós agradese ba Governu liuhusi Ministériu Juventude Desportu Arte no Kultura (MJDAK) hodi organiza ona eventu desportiva jogu Komunidade Ko’alia Lian Portugés (CPLP) ida-ne’e iha Timor-Leste.
“Ministériu ajuda modalidade tenis tanba ema hothotu bele mai haree no ita manan esperiénsia husi jogadór internasionál sira, husi jogu internasionál ida-ne’e organizasaun mós aprende oinsá hadi’a saida mak importante iha torneiu internasionál ne’e la’o ba oin. Agradese tebes ba MJDAK”, nia afirma.
Husi jogu ida-ne’e atleta sira bele dezfruta no aprende esperiénsia foun ruma, nune’e bele inspira foinsa’e sira seluk hodi hola parte iha modalidade tenis ida-ne’e.
“Manán ka lakon, pontuasaun ne’e buat ida. Manan, ita manan tiha ona. Tanba ne’e kompetisaun internasionál, rezultadu saida de’it importante mak ita-nia jogadór ne’e hetan esperiénsia hodi iha inspirasaun ba labarik sira seluk atu tuir. Ami iha programa kids tenis (tenis ba labarik), entaun ida-ne’e importante tebes ,” nia konsidera.
Entretantu jogu iha modalidade tenis ne’e, Timor-Leste iha ekipa ida, Portugál ekipa rua , Mosambike ekipa ida, inklui Angola. Depois jogu ne’e kompletu, ekipa númeru dahuluk (I) sei joga ho númeru datolu (III), númeru daruak (II) joga ho númeru dahaat (IV), no númeru dalima (V) elimina no kontinua hakat ba finál iha Kinta 24 Jullu 2025.
Jornalista : Felicidade Ximenes
Editór: Rafael Ximenes de A. Belo
