DILI, 23 Jullu 2025 (TATOLI)-Jogu desportivu husi Komunidade Nasaun sira ne’ebé ko’alia lian-portugés (CPLP, sigla portugés) ba dala-XII ne’ebé hala’o iha Dili, modalidade atletismu ho todan kilograma-lima iha tiru ba saltu dook, ba mane lidera husi Portugál tanba rekolla ona medalla osan-mean rua.
Prova “salto em comprimento” (saltu naruk) konkista husi atleta Samuel Vicente Amaro, ne’ebé manán ho pontus 6,37 hafoin halo liu adversáriu nain-haat hanesan, Lucas de Castro, Michael Patrick Almeida Diniz, Amilton Afonso do Espírito Santo no Veldenizio Correia de Jesus.
Segundu lugár konkore husi atleta, Michael Patrick Almeida Diniz (Kabuverde) ho pontus 6,2 no vensedór datolu konkista husi atleta, Amilton Afonso do Espírito Santo (Saun Tomé e Prínsipe) ho pontu 5,79.
Durante kompetisaun atleta sira hatudu sira-nia performe kompetativu tebes, balun haksoit a’as hodi hasoru loro-matan nia manas no kosar sulin maka’as, maibé sira la rende hodi kontinua kompete to’o ronde ba faze finál.
Oportunidade ne’e tuir vensedór dahuluk, Samuel Vicente Amaro, sente kontente tanba bele hetan vitória iha prova refere, maske nia ladún iha konfiansa ba nia-an durante kompetisaun tanba hasoru atleta seluk mós mesak treinadu de’it.
“Agradese ha’u bele oferese medalla osan-mean ba ha’u-nia nasaun, tanba durante kompetisaun loron rua, kuaze ha’u-nia kolega sira mak konkista barak, maibé agradese ha’u mós bele iha oportunidade”, atleta ne’e ba jornalista sira iha estádiu munisipál Dili, ohin.
Enkuantu iha kontinuasaun prova daruak nian “lançamento do peso 5kg”, konkista husi atleta Portugál, Guilherme de Oliveira Gavina, ne’ebé manán ho pontu 19,11, hodi halakon atleta nain-tolu husi nasaun Kabuverde, Timor-Leste no Angola. Maibé, atleta, Ismael Martinho Rodrigues Lopes husi Kabuverde mós kontinua esforsu hodi okupa iha segundu lugar, enkuantu atleta, Carlos S. de Oliveira (Timor-Leste), konsege manán iha terseiru lugar.
Reprezentante atleta “lançamento do peso 5kg”, Carlos S. de Oliveira (Timor-Leste), hateten satisfaz ho rezultadu ne’ebé nia konkore, maske nia okupa iha terseiru lugar maibé orgullu bele oferese medalla osan-metan ba nasaun Timor.
“Ida-ne’e hanesan ha’u nia kompetisaun ba dahuluk nian, entaun hanesan ema ne’ebé foin mak kompete iha nivel internasionál tenke esforsu hodi bele hatudu rezultadu ne’ebé mak di’ak durante kompetisaun”, nia afirma.
Nia dehan konsege hetan mós esperénsia barak iha kompetisaun ida-ne’e, tanba kompete ho atleta treinadu akedémiku sira liuliu husi nasaun Portugál.
“Ho nune’e ha’u husu ba Governu atu kontinua investe, ami atleta sira ne’ebé rekolla medalla, nune’e ami nia talentu labele para de’it iha kompetisaun internasionál iha rai-laran maibé bele mós partisipa iha nasaun seluk.
Atleta ne’ebé kompete iha prova dahuluk “Salto em Comprimento”, mak hanesan, atleta Samuel Vicente Amaro (Portugál), atleta Ismael Francisco G. Ebo (Angola), atleta Michael Patrick Almeida Diniz (Kabuverde), atleta Amilton Afonso do Espírito Santo (Saun Tomé e Prínsipe) no atleta Veldenizio Correia de Jesus (Timor-Leste), enkuantu iha prova daruak “Lançamento do Peso”, kompete husi atleta Guilerme de Oliveira Gavina (Portugál), atleta Ismael Martinho Rodrigues Lopes (Kabuverde), atleta Lucas de Castro (Angola), atleta Carlos S. de Oliveira (Timor-Leste).
Notísia relevante: Atleta Portugál Laura Branco rekolla medalla osan-mean rua
Jornalista : Alexandra da Costa
Editora : Rita Almeida
