Portugál mantein klasifikasaun durante jogu desportivu CPLP
DILI, 23 Jullu 2025 (TATOLI)-Jogu desportivu Komunidade husi Nasaun sira ne’ebé ko’alia lian-portugés (CPLP, sigla portugés) ba dala-XII iha Timor-Leste, Portugál mantein klasifikasaun iha modalidade hotu.
Portugál rekolla ona medalla hamutuk 17, atleta Portugál mós domina prova atletismu, enkuantu Kabuverde rekolla medalla osan-mean (ouru) no osan-mutin (prata).
Portugál rekolla medalla osan-mean (ouru) hamutuk 11 no osan-mutin (prata) hamutuk lima, no medalla osan-metan (bronze) hamutuk ida.
Klasifikasaun daruak okupa husi Kabuverde ne’ebé konkista medalla osan-mean (ouru) hamutuk tolu, medalla osan mutin (prata) hamutuk neen no medalla osan-metan (bronze) hamutuk ualu.
Klasifikasaun datolu okupa husi Angola ne’ebé konsege rekolla medalla osan-mean (ouru) rua, osan-mutin (prata) haat no osan-metan (bronze) rua.
Klasifikasaun dahaat okupa husi Saun Tomé e Prínsipe tanba halibur ona medalla osan-mean (ouru) rua, osan-mutin (prata) rua no osan metan (bronze) ida.
Klasifikasaun dalima nian ba Timor-Leste tanba konsege konkore ona medalla osan-metan (bronze) haat.
Biban ne’e treinadora atletismu husi Portugál, Daniela Fereira, hateten kontente tebes haree atleta Portugál sira domina iha kampu, ida-ne’e mak sira-nia esforsu tanba atleta sira kuaze treinu tinan naruk nia laran.
“Durante loron tolu sira hatudu performe ne’ebé di’ak tebes, ha’u louva ho sira tanba fila lori rezultadu ne’ebé mak di’ak ba nasaun Portugál”, dehan nia.
Nia hatutan, atleta sira-ne’e selesionadu no treinu iha akadémiku, tanba ne’e sira kompetitivu tebes bainhira partisipa iha kompetisaun internasionál ruma.
Enkuantu totál atleta ne’ebé mak kompete iha modalidade atletismu hamutuk na’in-52, kompostu husi Timor-Leste na’in-12, Portugál na’in-12, no restu ne’e kompostu husi nasaun Mosambike, Saun Tomé e Prínsipe, Kabuverde no Angola.
Notísia relevante: Portugál no Kabuverde kontinua lidera prova haat iha modalidade atletismu
Jornalista : Alexandra da Costa
Editora : Rita Almeida
