Portugál no Kabuverde kontinua lidera prova haat iha modalidade atletismu

DILI, 23 Jullu 2025 (TATOLI)-Kompetisaun modalidade atletismu, espesialmente ba prova korida 200 metru (feto no mane) lidera husi Kabuverde no Portugál iha prova korida 1500 metru (feto) nafatin okupa husi nasaun Kabuverde no korida estafeta 4×100 metru (mistu) lidera husi Portugál.

Vensedora ba korida 200 metru maka, Silvanilda Carina Delgado Gomes (Kabuverde), segundu lugár okupa husi atleta, Maria Seguru Nandim (Portugál) no terseiru lugár okupa husi atleta Leonor Silva de Freitas (Portugál), enkuantu iha korida 200 metru (mane), nafatin ho atleta, Tiago André Barros dos Santos (Portugál) mak sai vensedór. Segundu lugár lidera husi atleta, Tiago Miguel Martinho de Almeida (Portugál) no terseiru lugár konkista husi atleta, Keny Alexandre Semedo Ramos (Kabuverde).

Atleta Kabuverde nu’udar vensedora iha korida 200 metru, Silvanilda Crina Delgado Gomes, ko’alia ho matan-ben nakonu tanba orgullu bele konkista iha prova ida-ne’e, satán husi inísiu kompetisaun nia seidauk rekolla medalla.

“Agradese tanba lafasíl atu konkista, enkuantu durante-ne’e atleta husi Portugál mak sempre lidera, maibé ohin hanesan ha’u-nia sorti hodi bele hetan rezultadu ne’ebé mak di’ak” dehan nia iha entrevista ho jornalista sira.

Nia agradese ba nasaun Timor nia ema ne’ebé mesak di’ak, tanba durante-ne’e sempre haree no kuidadu sira husi hahú to’o ohin loron.

Durante kompetisaun atleta sira kompete ho kompetitivu tebes, maske iha faze eliminasaun atleta Portugál mak sempre lidera, maske faze finál konsege lidera fali husi atleta Kabuverde, tanba ne’e atleta hirak-ne’e hamonu matan-ben haree rezultadu finál.

Iha fali prova korida 1500 metru (feto) primeiru lugár hela ho atleta, Marina Cibelle Rodrigues Delgado (Kabuverde), iha segundu lugár konkore husi, Luana Raquel Pereira Monteiro (Portugál) no iha terseiru lugár okupa husi atleta, Daira dos Santos Carvalho (Kabuverde),

Prova korida estafeta 4×100 metru (mistu), nafatin lidera husi atleta Portugál, enkuantu vensedór daruak okupa husi Kabuverde no terseiru lugár konkore husi Angola.

Entretantu kompetisaun prova haat, kompostu husi korida 200 metru (feto no mane), korida 1500 metru (feto) no korida estafeta 4×100 (mistu), kuazé nasaun Portugál rekolla medalla hamutuk neen, nasaun Kabuverde rekolla medalla lima no nasaun Angola rekolla medalla ida.

Notísia relevante: Portugál lidera saltu dook iha modalidade atletismu

Jornalista       : Alexandra da Costa

Editora           : Rita Almeida