Saun Tomé e Prínsipe-Angola mantein vitória iha korida paralímpiku ho metru 200
DILI, 23 Jullu 2025 (TATOLI)-Saun Tomé e Prínsipe no Angola mantein vitória iha korida paralímpiku 200 metru (feto no mane), hafoin horisehik (22/07/2025) okupa iha primeiru no segundu lugár jogu desportivu Komunidade Nasaun sira ne’ebé ko’alia lian-portugés (CPLP, sigla portugés) ho modalidade atletismu, ne’ebé hala’o iha estádiu munisipál Dili.
Kontinuasaun iha prova korida paralímpiku 200 metru (feto) lidera husi nasaun Saun Tomé e Prínsipe, ne’ebé konkista husi atleta, Adlézia Neto de Trindade no segundu lugár husi atleta Saun Tomé e Prínsipe nian, Adjamila Boa Esperança no iha terseiru lugár konkista husi atleta Kabuverde, Ilisaria Brito Lopes.
Enkuantu prova korida paralímpiku 200 metru (mane) nafatin lidera ba dalarua husi nasaun Angola, no atleta ne’ebé vensedór maka, Eduardo Pedro da Silva no iha segundu lugár konkore husi atleta, Pedro Maruques Ecumbi, enkuantu iha terseiru lugár okupa husi nasaun Kabuverde, Delvin Francisco Soares Ganeto.
Treinadór atletismu Angola, Chindala Sanjanbela de Lunaty, hatete orgullu ho atleta paralímpiku sira ne’ebé konsege rekolla medalla osan-mean no mutin iha loron rua tuituir malu.
“Ne’e hanesan apresiasaun ba sira, maske atleta barak mak ladún domina iha prova atletismu nian, maibé importante fila labele liman mamuk”, dehan nia.
Nia afirma maske la rekolla medalla barak, ida-ne’e mak kompetisaun tanba kompetisaun nia laran sempre iha manán no lakon, no lakon la’ós signifika la esforsu.
“Ba oin ami sei hadi’a di’ak liután, nune’e iha fali kompetisaun tuir mai, ami-nia atleta sira bele kompete ho di’ak liután”, nia hatete.
Entretantu atleta sira-ne’ebé partisipa iha prova ne’e kategória husi eskalaun T11 to’o T13 no totál atleta ne’ebé kompete hamutuk na’in-10, ne’ebé kompostu husi nasaun, Saun Tomé e Prínsipe, Angola, Kabuverde no Mosambike.
Notísia relevante: Portugál no Kabuverde kontinua lidera prova haat iha modalidade atletismu
Jornalista : Alexandra da Costa
Editora : Rita Almeida
