VIKEKE, 23 Jullu 2025 (TATOLI)—Diretór Servisu Ministériu Obra Públika (SMOP) Munisípiu Vikeke, Casildo Gomes informa katak tempu badak sei halo reabilitasaun estrada nasaionál iha kapitál Munisípiu Vikeke hamutuk kilómetru haat (4).
“Durante ne’e ita-nia preokupasaun ba estrada husi área Betisi to’o iha Sentru Saúde Vikeke Vila ne’ebé tempu udan estrada nakonu ho tahu, difikulta movimentu sira. Maibé, ha’u simu ona informasaun pozitiva husi Ministru Obra Públika (MOP) nasionál fó ona kontratu ba empreza balun, ne’ebé tempu badak sei halo reabilitasaun estrada nasionál husi área Betisi to’o Sentru Saúde Vikeke Vila,” Casildo Gomes ba TATOLI iha ninia kna’ar fatin, Kuarta ne’e.
Notísia relevante : https://tatoli.tl/2025/06/04/igeadi-normaliza-estrada-kilometru-haat-iha-vikeke-vila/
Casildo informa projetu reabilitasaun ba estrada kapitál Vikeke Vila sei implementa iha tinan 2025 no projetu reabilitasaun ne’e sei fui asphalt.
Antes ne’e, Institutu Jestaun Ekipamentu no Apoiu Dezenvolvimentu Infraestutura, Institutu Públiku (IGEADI-sigla portugeza) iha fulan Juñu 2025 halo normalizasaun hodi ateru estrada husi área Betisi to’o área Beloi, hodi fasilita movimentu transporte públiku sira iha Munisípiu Vikeke.
Jornalista: Vitorino Lopez da Costa
Editór: Xisto Freitas da Piedade
