IGEADI normaliza estrada kilómetru haat iha Vikeke Vila
VIKEKE, 04 Juñu 2025 (TATOLI)—Diretór Servisu Obra Públika munisípiu Vikeke, Casildo Gomes Soares, informa Institutu Jestaun Ekipamentu no Apoia Dezenvolvimentu Infraestrutura, Institutu Públiku (IGEADI, I.P) hahú mobiliza ekipamentu pezadu iha munisípiu Vikeke hodi normaliza Estrada kilómetru haat (4 iha postu Vikeke Vila.
Notísia Relevante: PAM Vikeke koordena ho empreza GRIG-VOVEC normaliza estrada iha Vikeke Vila
“Durante ne’e, ita preokupa ba estrada iha kapitál Vikeke laran ne’ebé difikulta ita-nia komunidade nia movimentu. Tan ne’e, IGEADI, I.P komesa mobiliza ekipamentu pezadu hodi normaliza estrada sira-ne’e atu fasilita komunidade nia movimentu inklui ita sira-ne’e,” Casildo Gomes Soares informa ba Agencia Tatoli iha nia kna’ar fatin, Beloi, ohin.
Nia hatutan, normalizasaun estrada iha munisípiu Vikeke hahú husi área estrada Betisi to’o iha área Lugatoi, tanba dalan sira-ne’e kondisaun aat hodi difikulta movimentasaun transporte públiku no povu nia movimentu bainhira udan monu rai.
“Estrada husi Betisi to’o Lugatoi ne’e iha tempu udan difikulta tebes transporte sira-ne’ebé buka moris no ita-nia komunidade ne’ebé lori produtu ba faan iha merkadu. Kondisaun sira-ne’e durante tinan hirak ne’e ita hotu haree rasik. Tan ne’e mak ita husu apoia ba IGEADI mai para ajuda hadi’a ita-nia dalan,” nia dehan.
Kona-ba normalizasaun ne’e, nia dehan, IGEADI, I.P normaliza hodi hein prosesu konstrusaun ba estrada sira iha kapitál munisípiu Vikeke, ne’ebé mak agora daudaun sei prosesa hela atu halo konstrusaun.
“Agora ita-nia halo normalizasaun para, ita uza dadauk mak hodi hein ba prosesu konstrusaun estrada ba di’ak nian. Tanba, estrada husi Betisi to’o área Lugatoi iha prosesu ne’ebé ita hein de’it bainhira mak aprova no hein ninia implementasaun,” nia haktuir.
Tuir nia, IGEADI sei halo normalizasaun ho materiál lokál hanesan rai-henek hodi ateru ba dalan kuak sira-ne’ebé difikulta transporte sira no komunidade la’o ba-mai.
“Orsida ami sei ba haree direta materiál lokál hanesan rai-henek ba ateru nian, depois aban IGEADI hahú halo servisu normalizasaun. Enkuantu, ekipamentu sira-ne’ebé daudaun iha munisípiu Vikeke mak hanesan eskavatór iha Vikeke no ohin IGEADI kontinua mobiliza gleder, silindru inklui kamioneta sira-ne’ebé tula materiál normalizasaun nian ne’e,” nia hateten.
Ba normalizasaun Estrada ne’e, IGEADI, I.P koloka ekipamentu husi brigada Daitula Baucau mak halo normalizasaun ba estrada husi área Betisi to’o Lugatoi iha kapitál Vikeke ho totál kilómetru haat (4).
Notísia Relevante: Udan-boot rezulta rai iha estrada Lugatoi monu
Jornalista : Vitorino Lopes da Costa
Editór : Cancio Ximenes
