DILI, 23 Jullu 2025 (TATOLI)—Ekipa konjunta halo despeju administrativu ba uma-kain 28 ne’ebé antes ne’e tau ona markasaun hodi hamamuk, ba dezenvolvimentu projetu alargamentu estrada iha aldeia Has-laran, aldeia Sorumutuk ba Dame no aldeia Nato, ne’ebé pertense ba suku Kuluhun no Bemori, postu administrativu Kristu Rei, munisípiu Dili.
Ekipa konjunta kompostu husi Sekretaria Estadu Asuntu Topononímia Organizasaun Urbana (SEATOU), Ministériu Obra Públika (MOP), Ministériu Agrikultura, Pekuária, Peska no Floresta no Sekretaria Estadu Terra Proriedade (SETP) no akompaña mós husi Autoridade Seguransa, Defeza inklui Autoridade suku.
Sekretáriu Estadu Asuntu Topononímia Organizasaun Urbana, Germano Santa Brites, hateten, família afetadu balun kona morru, balun iha rai mamuk.
“Komunidade balun voluntáriu fó rai tanba sira presiza estrada. Sira sobu rasik sira-nia morru, kios, no gruta sira. Ita ohin mai ajuda baku morru ne’ebé sira sobu labele, entaun mákina mak sobu, nune’e kontinua to’o lorokraik, balun ulun to’os ita ko’alia sira koopera ita to’o kraik ne’ebá sei hasoru tan balun parese la hatán. Ita tenta ko’alia ba sira katak, ba oin bainhira projetu ne’e ramata bele fasilita Ambulánsia, Bombeiru no karreta Polísia bele tama inklui karik presiza tula moras kareta Ambulánsia bele asesu bá laran hodi lori sai, ida-ne’e mak importante,” Sekretáriu Estadu informa iha Kuluhun, Kuarta ne’e.
Nia haktuir, ekipa responsável hamutuk ho Terra no Propriedade no Obra Públika iha semana kotuk halo identifikasaun no levantamentu dadus ba rai privada sira.
“Ami hamutuk ho Terra no Proriedade sira halo ona levantamentu dadus, depois sira elabora dadus ne’e hotu entrega mai parte Obra Públika, ami sei halo publiksaun ba rai privada ne’ebé afeita ba alargamentu estrada,” nia akresenta.
Ekipa responsável kontinua halo levantamentu dadus tanba área luan.
“Dadus ne’e barak, ekipa sira presiza tempu, kleur bele fulan ida ka rua. Bainhira sira elabora hotu ona entrega mai ami halo publiksaun iha sede suku no sentru sira ne’ebé komunidade bele asesu informasaun ba,” nia akresenta.
Daudaun ne’e Obra Públika hamutuk ho ekipa konjunta lidera husi SEATOU hamamuk uluk fatin ne’ebé tau ona markasaun.
“Ami serbisu hamutuk ho ekipa konjunta ne’ebé lideradu husi SEATOU, hamos uluk fatin ne’ebé ami tau ona markasaun. Ekipa teknika sukat ona hotu mak kontrusaun estrada ne’e la’o, bele hahú iha tinan ida-ne’e nia laran. Área sira ne’ebé mak Obra Públika halo demolis tama hotu ona ba iha orsamentu planu kontrusaun estrada nian,” Governanate ne’e informa.
Notísia relevante : Ekipa konjunta SEATOU ‘hamamuk’ uma-kain 61 iha Aitarak-Laran
Estrda ne’e ho nia luan metru 8 no nia naruk metru 800. Medida ne’e inklui aspál, valeta, trotoár no eletrisidade.
“Komunidade sente espasu ne’e klot, sira konkorda ho metru 7, entaun husi metru 8 ne’e chor de’it,” Sekretáriu Estadu tenik.
Husi Ponte Namoradu to’o eskola CAFE laiha estrada asesu ne’ebé di’ak, tanba ne’e komunidade ezije tanba transporte labele asesu.
“Presiza halo alargamentu estrada hodi sira bele asesu ba estrada. Estrada ne’e husi Ponte Namoradu to’o mota Bemori. Ita loke estrada kapitál luan kedan. Ita serbisu dala-ida gasta dala-ida depois ita hotu mak sei goja estrada ne’e iha futuru, maibé iha diskusaun mosu fali balun hakarak fó no balun lakoi fó, rai klot liu no rai privada, maibé ikus mai sira aseita hotu. Ida-ne’e mak loron hirak ami mai tiha hodi diskute no ohin ami mai, Obra Públika hatun makina ita hahú serbisu,” nia katak.
Ekipa konjunta lideradu husi SEATOU iha loron 14 Fevereiru 2025, realiza diálogu ho komunidade suku haat hanesan Lahane Orientál, Santa Cruz, Bemori no Kuluhun hodi disemina informasaun kona-ba alargamentu estrada.
Jornalista : Osória Marques
Editora : Julia Chatarina
