OEKUSI, 24 Jullu 2025 (TATOLI) – Autoridade Inspesaun no Fiskalizasaun ba Atividade Ekonómika, Sanitária no Alimentár Institutu Públiku (AIFAESA,I.P) planeia sei halo atividade Inspesaun no Fiskalizasaun ho faze tolu atu kontrola estabelesimentu komersiál iha Rejiaun Administrativa Espesiál Oekusi Ambeno (RAEOA).
Diretora Operasionál AIFAESA, Claudina Soares Pinto, infroma, iha ámbitu diseminasaun papél AIFAESA nian ba operadór ekonómiku sira iha salaun administrasaun Numbei, ohin.
“Ohin ita halo divulgasaun informasaun, tanba iha semana kotuk, AIFAESA selebra akordu ho Autoridade RAEOA, ba destakamentu funsionáriu iha Oekusi, entaun antes atu hahú halo inspesaun no fiskalizasaun ita halo uluk diseminasaun ba operadór ekonómiku, tanba atividade inspesaun ita sei hala’o ho faze tolu, inspesaun regulár, inspesaun konjunta, sei envolve entidade relevante sira hanesan polísia, komérsiu industria, SERVE no parte saúde inklui imigrasaun nian, datoluk halo inspesaun bazea keixa no reklamasaun, ne’ebé hato’o husi komunidade sira, AIFAESA sei tuun urjenti hodi halo atuasaun,” Diretora Operasionál AIFAESA, Claudina Soares Pinto, koa’lia iha salaun administrasaun Numbei.
Notísia relevante:AIFAESA koordena autoridade no operadór ekonómiku atu destaka funsionáriu iha Oekusi
Diretora ne’e esplika, diseminasaun ne’e ho objetivu atu tulun operadór ekonómiku sira-bele kompriénde di’ak sira-nia devér, tanba dalaruma AIFAESA halo nia serbisu, ita nota katak, barak mak seidauk kompriende sira-nia dever atu garante katak, sira komprimenta ba lei ne’ebé iha, ezemplu sira kontinua venda produtu ne’ebé espiradu, danifikadu, falsifikadu no mós estragadu inklui kondisaun ijiéne.
“Tan ne’e, liuhusi diseminasaun ne’e, bele tulun ona operadór ekonómiku sira, atu bele garante kondisaun produtu sira hotu, nune’e bele livre husi sansaun ka koima ne’ebé mak sei aplika, kuandu deteta iha irregularidade,” nia informa.
Tuir ezekutiva ne’e katak objetivu husi atividade inspesaun no fiskalizasaun, atu kontrola estabelesimentu komersiál sira-nia kumprimentu ba lei, konservasaun ai-han no kontrolu kualidade ai-han no la’ós ai-han.
Daruak, atu verifika Indústria sira-ne’ebé prosesa produtu ai-han no la’ós ai-han, ho nia kondisaun no salubridade. Datoluk, atu kontrola restaurante sira-nia atividade ekonómika tuir lejislasaun aplikavel, iha nia funsionamentu, sanitária no prestasaun ai-han no bebida.
Dahaat, kontrolu lisensiamentu ba atividade prestasaun servisu sira, ikusliu mak kontrola fraúde merkadória no identifika estabelesimentu komersiál no posibilidade risku asosiadu iha ai-han sira.
Notísia relevante:Autoridade RAEOA-AIFAESA selebra protokolu kooperasaun ho pontu importante haat
Iha biban ne’e, Operadór ekonómiku, António Seran, rekomenda bainhira AIFAESA halo inspesaun no fiskalizasaun, labele konsentra de’it iha vila-laran maibé presiza to’o sub-rejiaun Oésilo, Pássabe no Nítibe.
“Tanba durante ami iha vila-laran mak sempre hetan inspesaun, entaun maluk sira iha área rurál ne’e livre. Ida-ne’e la justu, agora destaka ona iha Oekusi, ami husu tenke ba to’o sub-rejiaun sira, tanba dalaruma ita dehan sigarru ilegál barak mak sirkula ona iha sosiedade nia leet, ne’e tanba mai husi foho, balun fa’an sasán liu prazu ona, tanba laiha kontrolu,” nia rekomenda.
Notísia relevante:Autoridade RAEOA indika fatin provizóriu ba AIFAESA,I.P
Tuir observasaun Jornalista Ajénsia Tatoli,I.P, durante diseminasaun, AIFAESA mós promove diskusaun aberta liuhusi diálagu husu no hatan, maioria operadór ekonómiku sira hato’o rekomendasaun lubun ba AIFAESA atu haree ba área tolu, hanesan área komérsiu, área indústria ho área turístika.
Jornalista: Abílio Elo Nini
Editór: Rafael Ximenes de A. Belo
