OEKUSI, 14 Jullu 2025 (TATOLI) – Autoridade Inpesaun no Fiskalizasaun ba Atividade Ekonómika, Sanitária no Alimentár Institutu Públiku (AIFAESA, I.P) segunda ne’e, hala’o enkontru koordesaun ho Autoridade Rejiaun Administrativa Espesiál Oekusi Ambeno hamutuk ho operadór ekonómika hanesan loja-na’in no kioske sira, hodi destaka funsionáriu AIFAESA iha Oekusi.
Notísia relevante:Faan produtu liu prazu, AIFAESA taka provizóriu loja Qui Haung G iha Oekusi
Inspetora AIFAESA,I.P, Odete Viegas da Silva informa, enkontru koordenasaun ne’e hanesan faze dahuluk, aban tersa-feira, 15 Jullu 20225 sei selebra akordu ida, tanba futuru destaka funsionáru na’in-tolu, ho sira-nia papél tuir AIFAESA nian mak sei haree ba área tolu, hanesan área komérsiu, área indústria ho área turístika.
“Serbisu AIFAESA durante ne’e hala’o nia papél iha territóriu nasionál tomak, maibé konsentra de’it iha nasionál, hafoin funsionáriu sira tuun ba munisipíu atu hala’o servisu tanba limitasaun rekursu umanu no finanseiru no mós infraestrutura, maibé tuir planu ne’ebé AIFAESA iha, mak ohin ami mai halo koordenasaun, aban no bairua atu hahú destaka ona funsionáriu iha Oekusi,” nia ko’alia iha salaun IADE Oekusi,ohin.
Nia esplika, AIFAESA, I.P, kria husi dekretu-lei númeru 26/2016, loron 29 fulan Juñu, ne’ebé hetan alterasaun dahuluk husi dekretu-lei númeru 29/2024, iha artigu 16.o, atribui kompeténsia ba iha departamentu operasaun, no AIFAESA, nu’udar entidade inspetiva neʼebé utiliza instrumentu legál hodi hala’o inspesaun no fiskalizasaun ho planu operasionál integradu entre servisu departamentu implementadór sira ho abordajen avaliasaun ba fatór risku (risk based approach) no verifikasaun komformidade (compliance) tuir Lei neʼebé vigora
Tuir nia, objetivu husi atividade inspesaun no fiskalizasaun ne’e, primeiru atu kontrola estabelesimentu komersiál sira nia kumprimentu ba lei, konservasaun ai-han no kontrolu kualidade ai-han no la’os ai-han.
Daruak atu verifika Indústria sira-ne’ebé prosesa produtu ai-han no la’ós ai-han, ho nia kondisaun no salubridade, datoluk atu kontrola restaurante sira-nia atividade ekonómika tuir lejislasaun aplikavel, iha nia funsionamentu, sanitária no prestasaun ai-han no bebida.
Dahaat, kontrolu lisensiamentu ba atividade prestasaun servisu sira, ikusliu mak kontrola fraúde merkaduria no identifika estabelesimentu komersiál no posibilidade risku asosiadu iha ai-han sira.
“Tanba ne’e ohin enkontru koordenasaun de’it, aban mai ita foin ofisializa liuhusi asina akordu ofisiál ida ho Prezidente Autoridade RAEOA, nune’e AIFAESA bele hahú nia servisu diariamente iha Oekusi,” nia hateten.
Notísia relevante:AIFAESA taka provizóriu loja Xineza rua iha Oekusi tanba komete irregularidade
Iha biban ne’e, Prezidente Autoridade RAEOA, Rogério Lobato, orgullu no sei ofisializa polítika ida liuhusi akordu ofisiál ida nu’udar matadalan ba AIFAESA atu hahú hala’o nia papél iha Oekusi.
“Ha’u kontenti, tanba legálmente AIFAESA sei loke nia sukursál ida iha Oekusi, nu’udar Autoridade prontu atu kolabora, ho intensaun atu kontrola kualidade ai-han ita-nia ai-han sira iha Oekusi, klaru antes ne’e iha problema barak akaontese iha Oekusi, maibé susar tebes atu halo prevensaun, maibé ohin iha enkontru ho loza no kioske na’in-sira, aban ita hahú halo selebrasaun akordu ida, nune’e AIFAESA bele funsiona iha Oekusi, ida-ne’e ami orgullu tebes no importante atu fiskaliza bebeik iha-nia operadór sira, tanba dalaruma manipula data produsaun no folin sasán,” dehan Rogério Lobato.
Notísia relevante:Abríl-Juñu, AIFAESA halo inspesaun ba operadór ekonómiku hamutuk 826
Lorencio Caunan, nu’udar loja-na’in Mini-Zero, hato’o agradesimentu tanba ho prezensa AIFAESA iha Oekusi, bele tulun operadór ekonómiku sira, nune’e bele hadi’a sistema negósiu.
“Ba ha’u, kona-ba AIFAES atu destaka iha Oekusi, ne’e obrigatóriu, tanba bele tulun ami mós, atu bele hadi’a ami-nia sistema negósiu no hadi’a ami-nia servisu, durante ne’e laiha kontrolu dalaruma tinan ida mak foin tuun mai, agora planu Governu mós atu implementa podér lokál no dezentralizasaun, entaun AIFAESA tenki tama kedas atu kontrola sasán, tanba iha haree ho prezensa maluk Xineza sira iha Oekusi kompetisaun hahú maka’as ona, entaun kontrola mós sasán, sira-ne’ebé fa’an,” nia orgullu.
Jornalista: Abílio Elo Nini
Editór: Rafael Ximenes de A. Belo
