OEKUSI, 31 Marsu 2025 (TATOLI)–Ekipa konjunta liderada husi Inspetora Autoridade Inpesaun no Fiskalizasaun Atividade Ekonómiku Sanitária Alimentár, Institu Públiku (AIFAESA,I.P), Odete Viegas da Silva, segunda ne’e, taka provizóriu loja Xineza rua iha Rejiaun Administrativa Espesiál Oekusi Ambeno (RAEOA) durante fulan-ida tanba komete irregularidade.
Loja rua ne’e mak Bacara Plaza ne’ebé lokaliza iha aldeia Oésono no loza ida laiha naran ne’ebé lokliza iha bairru Numbei, aldeia Sanane perténsia suku Costa, sub-rejiaun Pante Makasar.
Notísia relevante:AIFAESA Hahú Halo Inspesaun iha Ainaro no RAEOA
Ekipa konjunta halo inspesaun ne’e kompostu husi Servisu Rejistu no Verifikasaun Emprezariál, Institutu Públiku (SERVE,I.P), Inspesaun Traballu Ministériu Komérsiu no Indutria (MCI), Polisia Nasionál Servisu Investigasaun Kriminál (PNSIK), Kamara Komérsiu Industria Timor-Leste (CCI-TL) no akompaña direita husi Polísia Nasionál Timor-Leste (PNTL) no autoridade komunitária suku Costa.
Inspetora AIFAESA,I.P, Odete Viegas da Silva, informa katak, iha loron hirak liuba loja ida viral loos iha mídia sosiál sobre operadór ekonómiku liuliu iha Oekusi katak komete irregularidade iha sira-nia fatin komérsiu.
Tan ne’e, ekipa AIFAESA husi nasionál hamutuk ho ekipa integradu husi liña ministeriál hala’o inpesaun nune’e bele observa direita iha térrenu .
“Ohin, ita halo inspesaun loja haat, rua mak mak ita taka tanba ami deteta duni irregularidade lubun hanesan, fatin la ijiéne, armazenamentu ladi’ak, hetan mós produtu estragadu no produtu espiradu no mós produtu danifikadu,” Odete Viegas da Silva ba jornalista sira hafoin hala’o inspesaun iha loja Bacara Plaza, segunda ne’e.
Notísia relevante:Loja xineza mak komete liu infrasaun iha Oé-Cusse – AIFAESA
Iha prosesu inspesaun, Inspetora AIFAESA ne’e dehan, “Ohin ita haree mós katak loja na’in-sira ladun koopera di’ak ami-nia atuante sira, entaun ekipa AIFAESA hamutuk ho PNSIK rejista aktu krime ida, ne’ebé PNSIK sei haree maibé husi parte AIFAESA ami sei halo sansaun asesória taka temporaria ba iha fatin komersializasaun ne’e normálmente ami fó durante fulan-ida, atu loja na’in-sira hadi’a nia armazenamentu tanba ita haree katak, iha armazenamentu kahur ona sasán sira-ne’ebé hahan no mós la’os ai-han”.
Aleinde ne’e, iha fatin rai na’an sira mós kondisaun la moos, iha produtu alimentasaun hanesan bebidas, ida-ne’ebé mak bandu maibé kontinua faan, entaun ida ne’e mak prosesu lubun ida mak sei fó ba loja na’in-sira.
Tuir nia, durante loja rua taka temporariamente ba fulan-ida, traballadór sira nafatin iha direitu atu hetan saláriu tanba prevista ona iha lei.
Tan ne’e, Inspetora ne’e rekomenda atu hadi’a jestaun internal entre loja na’in ho traballadór sira, nune’e bele promove liña kooperasaun di’ak .
“Ita simu mós reklamasaun husi traballdór sira katak iha jestaun internál entre loja na’in ho nia traballadór sira, tan ne’e asuntu sira hanesan ne’e presiza hadi’a internalmente. Agora buat ne’ebé AIFAESA identifika, ida-ne’e sira tenke koopera hodi hadi’a ba oin atu sai di’ak liutan,” nia katak.
Entretantu, kona-ba vídio virál ne’ebé públika husi pesoál traballadór ida husi loja Bacara Plaza, AIFAESA deteta duni iha armazein produtu barak nia data kaduka ona, maibé loza na’in kontinua faan.
“Balun la konsege hetan tanba parese loja na’in rai iha fatin seluk, maibé iha mós produtu balun sei rai iha parte kotuk maske espiradu ona, ligasaun ho informasaun ne’ebé virál iha mídia sosiál, agora ami foti ona auto-notísia ba kazu ne’e, depois sei hato’o ba Inspetora Jerál, no sei hatuun despaixu ba juridíku sira atu bele fó notifikasaun ba empreza no prosesu hotu sei ba iha Dili,” nia hateten.
Jornalista Ajensia Tatoli, I.P tenta konfirma asuntu ne’e ho loja na’in Bacara Plaza, maibé rejeita fó informasaun ba mídia.
“Deskulpa ha’u lakohi ko’alia ba mídia, saida mak ohin imi haree, ami kumpre tuir lei Timor-Leste,” dehan loja na’in Bacara Plaza no rejeita fó nia identidade kompletu.
Entretantu, tuir ajenda iha loron tersa,01 Abríl ne’e ekipa konjunta liderada AIFAESA,I.P, sei kontinua hala’o inspesaun ba loja sira iha Oekusi.
Notísia relevante:AIFAESA divulga instrumentu legál kona-ba regula atividade ekonómika iha Oé-Cusse
Jornalista: Abílio Elo Nini
Editór: Florencio Miranda Ximenes
