DILI, 25 Fevereiru 2020 (TATOLI) – Diretór Operasaun Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA), Gabriel da Costa, informa ekipa AIFAESA daudaun ne’e hahú ona halo inspesaun iha Munisípiu Ainaro inklui Rejiaun Administrativa Espesiál Oé-Cusse Ambeno (RAEOA).
Objetivu husi inspesaun ne’e, tanba AIFAESA rasik kontinua ninia knaar nu’udar institusaun ida atu halo inspesaun ba operadór ekonómiku sira ne’ebé halo atividade ekonómiku hanesan fa’an hahan liu prazu.
“Ami kontinua halo inspesaun regulár iha kapitál Dili no agora daudaun, ami iha ekipa rua ne’ebé halo hela inspesaun ba iha Munisípiu Ainaro no RAEOA”, nia dehan hafoin ramata halo destruisaun produtu apreensaun iha Tibar, tersa ne’e.
Nia akresenta, ekipa sira ne’e aranka ona ba terrenu no orsamentu ba atividade AIFAESA nian hodi halo inspesaun iha munisípiu mai husi orsamentu duodésimu fulan-fevereiru nian.
Diretór Operasaun AIFAESA ne’e realsa, parte AIFAESA kontinua halo kooperasaun ho institusaun relevante sira hanesan Ministériu Turismu, Komérsiu no Industria, Ministériu Saúde, Ministériu Aagrikultura no Peskas no Karantina ba kontrolu produtu alimentar sira.
“Ami kontinua mantein kooperasaun ho institusaun relevante sira ba kestaun kontrolu ai-han nian”, salienta Gabriel da Costa.
Jornalista: Natalino Costa
Editora: Julia Chatarina
