OÉ-CUSSE, 08 Novembru 2024 (TATOLI) – Autoridade Inspesaun no Fiskalizasaun ba Atividade Ekonómika, Sanitária no Alimentár, Institutu Públiku (AIFAESA, I.P), identifika loja xineza sira iha Rejiaun Administrativa Espesiál Oé-Cusse (RAEOA) komete infrasaun barak, tanba fa’an sasán liu prazu.
Xefe Seksaun Asuntu Jurídiku no Koordenasaun AIFAESA, Anosio de Jesus Araújo, informa asuntu ne’e iha ámbitu divulgasaun kona-ba papél AIFAESA no instrumentu legál sira ne’ebé regula atividade ekonómika iha otél Ambeno, ohin.
“AIFAESA halo ona inspesaun iha Oé-Cusse no identifika katak infratór ekonómiku sira iha RAEOA, liuliu xineza sira barak mak komete. Ezemplu, fa’an produtu liu prazu no atividade ne’ebé sira halo laiha lisensa komersiál husi SERVE”, Anosio Araújo informa.
Iha parte seluk, nia dehan, produtu sira-ne’ebé halo embalajen ba kilógrama la tuir padraun ne’ebé lei hateten, katak kilógrama ida labele inventa fali, maibé iha Oé-Cusse dalaruma la to’o nia kilo no presu mós la klaru.
Anosio Araújo salienta katak maske xinés sira halo tranzisaun husi Dili ho ró, maibé labele liu marjen ne’ebé dekretu-lei númeru 29 hateten ona katak rejista ne’e labele liu 10% no retalista labele liu 11%.
Maske nia lakohi sita detallu kona-ba númeru loloos, maibé infrasaun ne’ebé komete iha RAEOA maioria husi loja xineza sira no husi infrasaun ne’e balun kumpre ona hodi selu koima ba kofre Estadu.
“Sansaun ne’e depende ba infrasaun ne’ebé komete. Se fa’an produtu liu prazu, ohin loron lei rejime infrasaun altera ona, ne’ebé sei kona sansaun hahú husi $250 to’o $5000. Karik la kumpre, prosesa tuir dalan justisa iha tribunál”, afirma.
Anosio Araújo lamenta mós tanba loja na’in-sira, luliu xinés auzenta iha ámbitu divulgasaun papél AIFAESA no instrumentu legál sira-ne’ebé regula atividade ekonómika iha Timor-Leste.
“Xinés sira ohin ha’u la haree ema ida mai iha ne’e, tanba maioria sira mak komete infrasaun. Tanba ne’e, karik nia reprezenta iha, lori hela informasaun ba sira kona-ba lei sira-ne’ebé regula atividade ekonómika”, dehan.
Marcelino Colo nu’udar traballadór loja xineza Ezis Store, klarifika razaun loja na’in la partisipa tanba iha atividade seluk no balun la komprende tetun.
“Ha’u nu’udar traballadór mai reprezenta loja xineza, tanba diretór sira iha atividade seluk no balun ladún komprende tetun ne’e mak delega ha’u mai partisipa, maibé orsida ami fila sei esplika kle’an ba sira, tanba ohin ami mós halo gravasaun liuliu komete infrasaun ne’e atu hatudu ba sira”, nia hateten.
Notísia relevante: AIFAESA divulga instrumentu legál kona-ba regula atividade ekonómika iha Oé-Cusse
Jornalista: Abílio Elo Nini
Editora: Maria Auxiliadora
