OÉ-CUSSE, 08 Novembru 2024 (TATOLI) – Autoridade Inspesaun no Fiskalizasaun ba Atividade Ekonómika, Sanitária no Alimentár, Institutu Públiku (AIFAESA, I.P) divulga papél AIFAESA no instrumentu legál sira-ne’ebé regula atividade ekonómika iha Timor-Leste, ba negosiante sira iha Rejiaun Administrativa Espesiál Oé-Cusse Ambeno (RAEOA).
Xefe Seksaun Asuntu Jurídiku no Koordenasaun AIFAESA, Anosio de Jesus Araújo, hateten objetivu halo divulgasaun informasaun ba operadór ekonómiku sira atu esplika kona-ba kompeténsia lejislasaun sira-ne’ebé regula no atribui ba AIFAESA atu halo inspesaun no fiskalizasaun, liuliu lei sira-ne’ebé regula atividade ekonómika iha territóriu.
“Ami mai fó hatene ba operadór sira iha Oé-Cusse atu kumpre lei ba atividade ekonómika ne’ebé hala’o iha Oé-Cusse. Entaun, obrigasaun nu’udar fa’an-na’in ne’e importante no parte ida sira bele hasa’e kreximentu ekonómika, maibé parte seluk iha lei hateten katak tenke kumpre, se la kumpre maka nia konsekuénsia hetan sansaun”, dehan.
Notísia relevante: RAEOA koordena SERVE atu altera akordu ba atividade lisensiamentu komersiál
Nia salienta katak atividade divulgasaun ne’e hala’o ona iha munisipiu 13 inklui RAEOA, tanba rezultadu inspesaun ne’ebé AIFAESA halo dezde 2006 iha negosiante barak mak komete infrasaun, tanba fa’an sasán liu prazu no laiha lisensa komersiál, inklui sasán ne’ebé Estadu bandu atu labele fa’an.
“Tanba ne’e mak divulgasaun ne’e, SERVE, I.P no Alfándega sei halo aprezentasaun atu esplika kona-ba prosesu hetan lisensa negósiu no Alfándega esplika kona-ba Lei Importansaun no Esportasaun, tanba Oé-Cusse iha fronteira no persiza mós atu hatene lei sira-ne’e”, nia informa.
Notísia relevante: Reprezentante povu kontinua husu AIFAESA, I.P kontrola sasán liu prazu
Iha fatin hanesan, Koordenadór SERVE, I.P sukursál Oé-Cusse, Reinaldo António Mendonça, konsidera sensibilizasaun ne’e importante ba operadór sira, maibé sente triste tanba empreza sira ne’ebé durante ne’e manán projetu boot iha Oé-Cusse la partisipa iha atividade ne’e.
“Ohin, haree estudante no reprezenta barak mak mai partisipa, ha’u la haree diretór sira kompañia sira-ne’ebé durante ne’e manán projetu boot iha Oé-Cusse. Maibé ne’e ligasaun direta ba sira-nia atividade, tanba ami SERVE haree liu ba legalidade dokumentu no AIFAESA inspesiona atividade ekonómika”, afirma.
Tanba ne’e, nia husu reprezentante sira persiza partilla tutan informasaun sira-ne’e ba dirijente empreza no loja sira, nune’e bele kontribui ba hamenus infrasaun liuhusi trata dokumentu no fa’an sasán kumpre nafatin lei.
Lorenço Caunan nu’udar negosiante hateten ho divulgasaun ne’e bele aumenta koñesimentu, liuliu kona-ba lei sira ne’ebé regula atividade komersiál.
“Divulgasaun ne’e importante ba ami atu hatene tuir ami-nia kna’ar no devér, maibé ba ha’u rasik dalaruma ladún satisfeitu tanba AIFAESA durante ne’e aplika lei sira-ne’e iha Dili de’it, ami iha munisipiu laiha ema ruma atu kontrola ami, maibé agradese ohin bele fahe ona regulamentu sira-ne’e mai ami atu kumpre”, nia salienta.
Notísia relevante: AIFAESA, I.P sei hetan apoiu laboratóriu movél hosi BPOM Indonézia
Iha divulgasaun ne’e Alfandega mós halo aprezentasaun kona-ba Lei Importasaun no Esportasaun no SERVE aprezenta kona-ba prosesu halo rejistu atu hetan lisensa negósiu.
Jornalista: Abílio Elo Nini
Editora: Mari Auxiliadora
